8 jul 2006

A Piscina du Pretil y u merendeiru de Julian.



Tos us anus, cuandu chega u verán, somus mutus y mutas valverdeirus y valverdeiras que mus acordamus da piscina du pretil.

Se trata d´uma piscina natural que se fizu nu cauci da riveira de Sabugal, fai mais de trenta anus, sendu Alcaldi du lugal don Vicente Muriel.

Se chega pur a antigua carreteira de Navasfrías, partindu da Avenida de Salamanca o desd´a calli As Cortis, por citar algumas das vías máis utilizas pa accedel a ela y dista du centru du lugal no mais de setecentus metrus.

U anu pasau non pudemus disfrutal dus chapuzons y dus refrescus das suas aguas, debiu a sequía, peru esti anu, de momentu, se encontra chea y rebosanti comu nus milloris verans.

E uma riqueza que temus en Valverdi da que, comu valverdeiru, me sintu orgullosu, peru sería bo que as institucions se implicaran un poicu pa restaurala y adecental to u entornu, nun estaría de mais tampocu que se ficera un paseu iluminau ya que son mutus us zagais y zagalas y veciñus en general que pasean pur as noitis pur a antigua carreteira de Navasfrías, buscandu a frescura da riveira y se transita tamén cun ciclomotoris, motocicletas y toa clasi de vehículus motorizaus, habendu escasa iluminación pur as noitis cun u peligru que representa, sobri to pus peatons, sendu ademais estreita a carreteira nesi tramu.

Tamén se podría instalal algum cartel nas inmediacions da piscina ondi se ficera un avisu a canalla y a tos us usuarius en general, nu sentiu fundamentalmenti de que respetin u entornu y procurin mantel limpa a piscina y us seis alredeoris.

Asina procurariamus alargal a vida desti refrescanti paraji pa que podan disfrutalu tamen tos aquelis que veñan detrás de nos.

E d´agradecel qu´a familia de Julian "u molineiru" y de Petra, a sua viua, tos us anus mus abran u merendeiru nu que antis era u muñu pa que mus refresquemus tamén pur dentru.

S´eitan en falta as ensalás que preparaba a tía Petra cuandu vivía Julian, aunque alabu u tesón desta mullel qu´a sus noventa y tantus anus feitus inda se movi pur u merendeiru recollendu cualqueira coisa pa ajudal us seis netus.

Aquelis y aquelas que gustin d´aguas chocas, se asteñan de metersi nesta piscina, purque as aguas da riveira de Sabugal están feitas pa emocións fortis.