UN SITIU VALVERDEIRU.

De linajis valverdeirus.

2012-01-28T21:27:00.002+01:00

U día 26 de diciembri du anu 2009 subínesta bitácora un trabalhu que cu títulu “De noblis valverdeirus”, daba a cunhocel u qu' había conseguíu sacal a lu,dispois d' un largu procesu de busca en distintus archivus; sobri ulinaji Cid. Familia de noblis que viviran e nu nosu lugal y quedejaran a sua impronta ca.

U ficía animau pur demostral qu'ascoisas importantis que mus atanhin a nos, podemus dicelas envalverdeiru aunque non cheguin cu tanta facilidai a aquelas otraspersoas que non falan igual que nos.

Han pasau dois anus d' aquela fecha ysintu a gran alegría de manifestal a cuantus se dan un' avorta pur esta bitácora, de qu' aquel trabalhu tamén se ten enconta fora du nosu lugal.

É asina qu' enu númeru 27 da revistaD&M – detección y monedas – Noviembri Diciembri 2011, sepublica esti artículu a nivel nacional, en castelhanu y cu asampliacions que me permitiran tantu us datus de que disponhu agora, asina comu a predisposición du equipu de redacción destarevista que me do toas as posibilidais pa impimil us resultaus sin problemas d' espaciu.

Si non contais cua revista y tindisinterés en disponhel desti númeru, podéissolicitalu, tal y comu se vus indica aquí: Puntos de Venta.

Si u que queréis é consultal u artículu dus noblis valverdeirus en castelhanu, podéis bajalu da página daBiblioteca Virtual de Sierra de Gata, clicandu nesti enlaci: U linaji Cid en Valverdi.

Biblioteca Virtual du Centro de Estudios Sierra de Gata.

2012-01-23T23:23:00.001+01:00

En abril du anu pasau -2011- se reuniran en Villasbuenas de Gata investigadoris y escritoris de Serra de Gata, nesa reunión tuvi u honol de participal. Enu desarrolhu da misma se chegó au acordu de formal un´a comisión gestora pa creal un´a asociación cultural.

Dispois das gestions necesarias, foi da d´arta ena Consejería de Administración Pública, a asociación Centro de Estudios Sierra de Gata (CESGATA) pa recopilal, preseval y dal a cunhocel u patrimonu documental.

A primeria iniciativa que pusu en funcionamentu esti Centru, é a Biblioteca Virtual, ena que tos us mesis se recomenda un´a obra, tamén as persoas podemus sugerir obras o comunicarmus cu centru; asina comu bajal a documentación oportuna pa envial enu casu de que queramus ficermus socius du Centru.

A Biblioteca está dividía en seti seccións, que vus explicu:

BIBLIOTECA DIGITAL.
Aquí se van recopilandu tos us artículus y trabalhus que estén digitalizaus, relacionaus cua Serra de Gata.

FONDO CLÁSICO.
Se relacionan us documentus, obras y artículus non digitalizaus, de escritoris e investigadoris que tenhan interés históricu, artísticu o cultural y que se podin compral enas librerías o consultal enas bibliotecas públicas.

RECURSOS DIGITALES.
Se trata de enlacis a obras que se podin consultal ena internet.

FOTOTECA.
Sección ena que podemus colaboral subindu as nosas fotografías que tenhan un valol especial pur a sua antigüedai o pur u sei conteníu.

FONOTECA.
Inda non ten ninhun´a coisa, peru suponhu que será pa relacional aquelis documentus sonorus cu relevancia ena Serra de Gata.

LA CRÓNICA.
Ten enlacis a us distintus númerus da Crónica da Serra de Gata, que ya dejó de editalsi, pur si alguén desea bajarsi, pa consulta en formatu pdf.

CESGATA.
De aquí te leva a página propia du Centro de Estudios de Sierra de Gata, enu que se explica qué é u Centru, se mostran us estatutus, us órganus de gobernu, us miembrus y colaboradoris, as formas pa ficersi socius y pa contactal cu Centru.

Ena próxima entrá que faia nesta bitácora, vus daré cunhocimentu dus distintus artículus y obras relacionaus cu Valverdi y a nosa fala que podemus consultal nesta biblioteca digital.

En lagarteiru.

2011-12-16T00:45:00.000+01:00

É un´a pena que non esté enteiru y cu boa calidai.
De toas as formas, a mostra mus da a cunhocel un´a típica reunión mentras se fai a matanza.
Costumbri que se vai perdendu, ena que varias persoas de familia y vicinhus, se reunin pa pical a carni du cuchinu, preparal a proba (u probu), y ficel us churizus, as murcelas, us jamons y u restu da chacina.
Nestas faenas se usaban grandis caixas de meira (madeira), chamás artesas enas que se adobaba a carni. Antis, a matanza se levaba a cabu ena parti da casa dondi estaba u fugal, enu que se punhían as tripas, dispois d´ habelas lavau enu ríu, dentru da olla y ésta sobri us estrenis chea de agua que fervía cuas tripas dentru, pa desinfestalas antis de enchelas cua proba du chorizu u da murcela. A farta de estrenis, o pa aproveital milhol u fogu, tamén se colgaban us perois enas lharis, dondi se diba ficendu a cucinha, se quentaba a agua, o se mantía quenti a cumía ya feita.
Nesta representación podemus vel que pa quital u fríu du corpu, mentras se faenaba; bebían aguardienti.
Esti saineti, é obra d´un lagarteiru. Se representó enas festas d´agostu du anu 2010.
Si sabéis du autol y si existi algún vídeu de milhol calidai ena re pa enlazalu, vus agradecería que mu ficeráis sabel.

Du qu´en otrus tempus foi Valverdi.

2011-10-13T23:23:00.000+02:00

Un´a ve mais me permitu publical un textu inéditu de mei padri Segundu Corredera, enu que recolhi de forma amena coisas que diba recopilandu relacionás cu lugal.

Nesta entrá se fala sobri u asesinatu d´un cura. Au final du textu vus ponhu u enlaci au mei trabalhu d´investigación sobri u asesinatu du cura, que publiquí enu sei día nesti mismu blog.

U textu é comu sigui:

Dicin qu' us pobladoris desti lugal eran originarius du antiguu lugal de Salvaleón, pueblu que se falhaba situ nu mediu das ajuntas dus ríus Basádiga y ribeira das Ellas. Inda se podin vel restus da muralha y da ermita de San Bartolomé. Ésta s'encontraba de frenti da praza de Salvaleón, du otru lau da ribeira das Ellas. Du otru lau du ríu Basádiga está u tesu dus Tirus. Falaban que nesti lugal dondi inda se falhan us restus da muralha, era un lugal encantau dondi nun se pudía dil de noiti purque seían encantus de maneira de grandis culebras. Dicin tamén, qu' as campanas se falhan nu fundu du pozu das campanas da ribeira das Ellas.

Tumba antropoforma en finca puru caminhu da Canhá.

Se fala y é certu que nu nosu campu de Valverdi, en distintus parajis; se falhan sepulturas de pedra y buracus de minas. Enun destis buracus s' encontra un grandi tesoiru peru nun se poy bajal la. Uná ve ya quiseran ficelu y colgaran un homi mitiu enun cestu y tuveran que subilu insiguía pur culpa dus musquitus. Tamén hay uns vieirus de dondi pareci sel us antiguus sacaban minerais, que lavaban nu ríu Sobreiru que quel dicel: "riu sobri oiru".

Nu coitu du Siganu dicin que hay un' a pedra cua media luna.

Us mais velhus desti lugal, contaban tamén qu' una ve ocurríu un casu cun cura. Diba a ermita du Espritu Santu, le seiran dispois de pasal u barrocu "campanina", sitiu da fonti Peligru; uns ladrons y dispois d' atalu u levaran a fonti du Cura, dondi dicin le deran de bebel. Siguindu u caminhu, chegaran cu el au altu da serra da Marvana, dondi falan foi mortu nu sitiu cunhocíu comu a "mata du cura". To istu nun sin antis interesal us ladrons cua familia un rescati sirvindu de recadeiru un tal "tíu Espuela". Cuandu us ladrons se falhaban enun lugal de Portugal, un' a partía dus mozus mais valentis desti lugal, foran en busca delis armaus cus palitroquis y otras ferramentas y afoicis. Cuandu us trujeran y foran juzgaus, us ajusticiaran ena Cru dus Términus, que s' encontraba nu altu du Tesu Rutu y alí mismu us enterraran. Nun fai mutu tempu, inda estaba alí a cru y un' a montoneria de terra dondi debaju foran enterraus.

Dispois de pasal to istu, cualisquera du lugal que tinha que dil u Espritu Santu, cuandu pasaba puru sitiu dondi us ladrons apañaran au cura, tinha qu' agarral un' a pedra du caminhu tirándua nu mismu sitiu facendu un' a montoneira delas.

Comu hemus falau dus mozus mais valentis du lugal, entoncis alguns eran muy jándalus. Ei sendu pequenu le uiví un día un´a palreira a dois velhus que espritaban u sol na praza. Ninhún dus dois levantaba un´a vara du solu. Ya us probis eran ringaus, seguru puru pesu dus anus y us mutus trabalhus pasaus. Sustribaus contra a paré, apoyaus en tortas cayás de carbalhu, un le dicía au otru:

- ¿T´acordas Gelitu aquel día que fuimus as cepas, cas arrincamus na corta da Tuirinha, mais arriba da Malmadura y vinhamus chegandu as Encrucilhás, a minha faca qu´era canúa, me tiró cua carga y me reventó u barquinu d´agua? Ei me pusi feitu un perru, me caguí en "Crista", apanhí u cabestru, le apretí ben as barbelás, le mordí nu pescozu y me quedí cua boca chea de pelus da crin. Logu tembraba comu un´a berga, se mixaba toa, le soaba u bandulhu y se pusu a eital buralás.

Logu le diju u Gelitu:

- Sí, Anés, si m´acordu d´aquilu y desdi aquel día te quedaran u moti de "Andrés u Caninu".

Logu le diju u Angelitu au Andrés:

- ¿Nun t´acordas cuandu díbamus a sel sordaus, aquela noiti da ronda que fuimus a cantal debaju du corredol da Goya, que vivía na calli da Fontinova, que ey le canti: "Si te pregunta tua madri quen t´ha rotu u mandil, dili qu´ha siu un sordau cua punta du fusil"? ¿Qu´ela en cuantis mus barruntó, insiguía bajó as escaleiras de traba, do media volta a chavi y s´abríu a porta, aparecendu a Goya cun pratu de perrunilhas y un´a panilha d´aguardienti? Tinha us cordons dus justilhus sortus, u refaju desabrochau y us pes descalzus. Mus pusimus comu un´us burrus, tu empurriasti un poicu, ela se ríu, mus cumimus as perrunilhas, mus bebimus a aguardienti y mus quedó plantaus.

¿Y d´aquel día cuandu estábamus en Melilha, aquela moira que se chamaba Casia, que vendía agulhas y nuvelus de linhas, que mus engalhotamus. M´ha leví detrás d´un´as figueiras chumbas y m´ha furí?

Logu le contestó u Andrés:

- Ey nun ví si ha furasti u nun ha furasti, peru si ví que tu vinhas cuas pelnas zambras y ela se sacudía u porvu. Qué panzá de ril mus dimus cuandu tu Gelitu me dicías, vamus correndu pa tienda que vanin a tocal "Reteta" y ei te diji nun é reteta, é Retreta y desdi aquel día te quedí Angelitu u Zambru.

Cuandu us dois se rían distu, chegó otru velhu dicendu:

- Boas tardis.

Y siguíu:

Papel de lial pa ficel cigarrilhus.

- Acabu nesti instanti de vel a "Pitiscu" nu relhanu. Pa dilmi pa casa me do pur vil pura praza, peru au velbus aquí impinaus, me diji: aquelis dois lipendis juntus nun podin tramal coisa boa y vinhi a cheiral pul vel que facíais.

U Caninu respondeu:

- Cuntábamus as coisas d´en tempus, das que tu nun ques uivil ni facías de mozu, pur isu te chamaban "Curinha".

Logu aquel que le chamaran "Curinha", meteu a man nas vortas da banda, sacó un´a bulsinha, un librilhu du rey d´espás, un guixarru de pedraneira, un trapu rebulhau cun linhas facendu de mecha y un´a argola de ferru. Ficeran un cigarru ca un. Pusu a mecha encima du guixarru, dó un golpi cua argola de ferru, fizu lumi na mecha, encenderan us cigarrus y fumaran us tres.

Enlaci a: Asesinatu du Cura Párrocu.

Valverdi.

2011-07-28T16:04:00.001+02:00

U día 7 de juliu de fai dois anus subí a entrá que baju u nomi de "VALVERDI ¿Pur qué u (a) chamamus Valverdi du Fresnu?" daba a minha opinión cu respectu a cuantu ei cunhocía sobri u tema.

Amanecendu en Valverdi.

Esta misma entrá foi publicá ena edición correspondienti a Juliu du mismu anu da Crónica Sierra de Gata, sección US TRES LUGARIS.

Agora, gracias a mei padrinhu Enrique Burguet que me do a cunhocel dientri da Editora Audio&Visual Factory y cu as portas que me abríu a redactora Anna Ventayol, he vistu cumpliu un dus meis sonhus. Nesti casu ca idea que ei tenhu du nomi du nosu lugal poda chegal au cunhocimentu de muta genti.

A editora Audio&Visual Factory publica a rivista "D&M detección y monedas", a primeira rivista a nivel nacional pa us aficionaus aus detectoris de metais, a numismática, a investigación histórica y u coleccionismu.

Enu númeru 25 que seiu publicau nesti mismu mes de juliu apareci u artículu sobri u nomi de Valverdi, en castelhanu u que da posibilidai de que mais genti poda leelu y debatilu.

Ademais he contau cu mais espaciu pa publicalu u que facilita a compresión pa quen u lea dau que está menus resumiu y conta cu a relación das fontis enas que he bebiu pa ficelu.

Quen queira disponhel du númeru compretu da rivista, poi vel as formas de compralu entrandu ena web da rivista que tindis arriba.

Si queréis solu contal cu artículu, pinchéi encima du enlaci que vus ponhu aquí debaju.

VALVERDE ¿Por qué la denominamos Valverde del Fresno?

Deseu que vus gusti. Si alguén ten otra opinión o datus que contradigan u que ei defendu, me gustaría que me dera a cunhocel as suas pesquisas o fundamentus.

Us tempus cambian.

2011-07-13T17:13:00.001+02:00

Repartu de correu motorizau.

Han cambiau mutu us tempus de fai cen anus pa ca, tamén cu que respecta au serviciu de correus.

U Vernis día 18 de noviembri de 1910, enu diariu CORRESPONDENCIA DE ESPAÑA, edición da minhán y sección “Buzón de Provincias”; se reproducía a queixa de varius vicinhus valverdeirus sobri u serviciu de correus purque habían pediu qu' u peatón que facía u serviciu diariu se detuvera en Valverdi un'a hora, pa puel contestal enu día a correspondiencia urgenti, dicendu qu'a medía sería recibía cu aplausu, sobri to puru comerciu y puras dependencias oficiais comu u ayuntamentu, aduanas y carabinheirus.

Us vicinhus dijeran qu'a contestación foi comu dalis cua badila enus nudilhus, purque en lugal de qu' u peatón aguantara un'a hora, ordenaran que durmira en Valverdi.

Desta forma quedaran piol qu'antis purque se perdían 24 horas mais pa seida das cartas, causandu un perjuiciu ben notoriu, molestandu, de forma inútil au modestu empleau que conduci a valija y perjudicandu as Elhas y a San Martín, aus que tamén alcanzaba esti novu retrasu d' un día.

É pur isu que cua queixa pidían qu' as coisas volveran au estau enu que se encontraba antis das gestions realizás.

U día de San Bras du anu 1927 u ayuntamentu pur unanimidai acordaba pidil a Dirección General de Comunicaciones, que se creara ena vilha un'a estafeta de correus cu caja postal d'ahorrus.

Dois anus dispois se acorda incluil enus presupuestus municipais u créditu extraordinariu pa leval pa dientri a construcción da casa du serviciu unipersonal de correus y telégrafus.

D' aquelis primeirus tempus a agora ha choviu mutu.

Mónica. Agenti de repartu motorizau.

Belarmina é a empleá que mais tempu leva ena oficina y me conta qu'antis cuandu sei padri era u carteiru a genti esperaba cu impaciencia a que chegara, que pur certu nun tinha horariu. Había muta genti vivindu enu campu que subía us dumingus y era nesis días cuandu recolhían as cartas, algún paqueti o ponhían un giru postal pa u filhu que estaba prestandu u serviciu milital.

Había cuatru persoas trabalhandu pa oficina, duas a tempu compretu y duas a tempu parcial, cu horariu au públicu mais ámpliu du que se presta agora.

Que si ben a genti utiliza otrus medius pa comunicarsi, hay mutu mais correu qu'antis.

Que ha lutau mutu pur conseguil milhoras comu a da oficina o a motu de repartu. Recorda cuandu pur falta de presupostu tinha que alquilal cocheiras enas que pasaba muta vergonha pur u estau tan lamentabli du serviciu.

U nucleu de población de Valverdi hoxi é muy extensu y non se podía repartil cu agilidai toas as cartas.

Esta minhán a primeira hora se preparaban pa faena Paco u lagarteiru, que ven realizandu tareas d' oficina y de repartu de forma temporal, y Mónica.

A primeirus de febreiru desti anu se creó pur fin a praza de repartu motorizau pa Valverdi que foi cuberta pur Mónica y tomó posesión u día 1 de marzu.

Desdi entoncis a vemus recorrel a sección 2 du lugal montá ena motu repartindu u correu y a paquetería. Me dí qu'u lugal pa u serviciu de correus está dividiu en duas seccions. A segunda sección empeza desde u ríu ponti hasta a gasolineira y toa a zona du tesu rutu asina comu as cortis. A primeira sección é u que sempris hemus chamau comu “u lugal”, podemus dicel que se trata du centru.

Mónica é de Cia Rodrigu y está encantá, le gusta mutu u lugal y se fai tos us días 12 a 13 kilómetrus de repartu. U que non me contó peru mu diju Belarmina é que sobri to au principiu u pasó mal cu algún perru sortu pur as callis.

A vel si siguin cambiandu pa ben as coisas y vemus ampliau u horariu d' atención au públicu ena oficina y acercan de verdai a administración aus ciudadanus adaptándua as novas tecnologías que podamus punhel pur ejemplu un giru postal sin tel que desplazarmus aus Foius.

Us motis de Valverdi.

2011-05-03T00:03:00.004+02:00

A fotu da praza, que está detrás du homi,

perteneci a galería de Florencio López Pozo.

A podéis consultal en:

http://www.flickr.com/photos/florenlopez/

Fai anus curría pur a serra un´a revista cultural baju u nomi de AGATAE.
Tomandu vinhus enas Elhas, m´encontraba enu bar de Bravatas cu mei sogru y varius lagarteirus mais. Había un que ei non recordaba comu se chamaba y cuandu le preguntí me diju: "ei me chamu fulanitu, peru tu chámami CHANA que asína me chaman y me cunhoci toa ishenti".
Aquelas palabras m´animaran a escribil ena revista AGATAE un artículu sobri us motis enu que resumía un trabalhu inéditu de mei padri, Segundo Corredera; que recopilaba un´a cantidai grandi de motis du lugal cu muta gracia.
Fotocopias d´aquela recopilación de mei padri se guardan agora en mutas casas du lugal y alguns trozus aparecin pur a interné.
É pur isu, en honol a mei padri y pa que podáis seguil disfrutandu cua lectura completa d´aquel trabalhu dus motis; vus lu pegu aquí debaju ficendu a salvedai de qu´ he cambiau sobri u original as grafías dus soníus "ñ" y "ll" pur (nh y lh). Tamén enu escritu original, Segundo escribía asín, sinsa, pelusia, saramagas... que ei he cambiau pur axin, xinxa, peluxia, xaramagas...

Dicía mei padri:

Chapurreao que dedico a Valverde del Fresno, para honor de los que viven y en recuerdo y gloria de los muertos.
Nesti lugal comu en otru cualquera, se criaban as familias ricas ahorrandu y as probis trabalhandu. Us zagais pequenus diban a escuela us que podían otrus guardandu cabras o cuchinu; diban a us nius a us figus y pegaban cu bergalhu y se nadaba enu pozola y enu pozu carbalhu. Se sembraban as hortas de patatas, axins, tomatis, cebolas, milhus y alhus. S´arrancaban cepas pu fogu y enu fugal se almorzaban as migas de gatu, se cumía a cucinha y se ceaba u alhu. Diban a apanhal acituna y de merenda se levaba pan y cebola, figus pasaus, axin d´adobu o molhu de axins secaus.
Us mozus diban de ronda cu chuzu y linterna. As mozas diban a buscal agua a levá de enchel; lavaban enu ríu Figueiras, ena ponti reganhacús y enas pasadeiras. As mulheris s´espulgaban enu sol y se pendaban cua lendreira y cu pendi de cornucu y logu se miraban cual tinha milhol u currucu.
Se bibía u vinhu pur jarras de barrunera y se cumían us chochus salaus da tía Luisa turrunera.
Enas procesions de Jovis y Vernis Santu us zagais currían diantri du tíu da cana escapandu du canazu mais forti y cantandu u "danus Senhol boa morti".
En San Bras, se currían us cabalus y us burrus puras callis, se cantaba "a chana" y u "manojo le escribe carta a su hermana la pequeña, que le mande la navaja para matar a barreña".
En San Antoniu se facían as capeas ena praza, inda m´acordu das últimas qu´hubu du tíu du pelheju, m´acordu comu se candaban us nuvilhus. Un´a tardi duranti a capea cuas vacas du tiu Juliu chaparrinhu, estandu capeandu u nuvilhu estrelau, u tiu faisinhu, que estaba subiu ena roa que tinha pur talanqueira; se durmiu, se queiu y se fizu un´a boa piteira, du que se ría mutu a tía volandeira.
M´acordu tamén qu´un´a vaca salina a qu´Chiripu das Elhas picaba cua guilhá, s´arremeteu y au rubiu nafrienhu le rompeu us pantalons pura galhá. Cuantu se ría y divertía un cu aquilu, de vel correl de meu a cualquera, solu cu dicel que ven u da escarapela.
Peru agora ven u bo.

Capeas ena praza da Constitución de Valverdi.
Fotu da galería de Florencio López Pozo
http://www.flickr.com/photos/florenlopez/

Estandu un día de San Antoniu bailandu ena praza dispois da capea, volaban ya us murcéganus y alumbraus pur candelinhas, tocaba u tamborileiru, u corneta, u releixu y u tíu chucalhinhas.
Estaban vistías de sayas de picau, panhuelu de cen coloris y u mandil bordau, a trucha, a furmiga, a culebra, a mora, a pata, a salomé, a rola, a liendris, a peluxia, a calistrixa, a tata, a suyinha, a pumpilha, a cachucha, a xaramagas, a pesea, a jaima, a pergas, a josefina, a jaba, a sebastianada, a monja, a pulunita, a payaya, a cagalis, a pasea, a zoila, a chacha, a chusquinha, a guapa y a Rosa du mel.
Logu chegaran u poleu, u vinagri, u migalhón brancu, a lechuga, u cebolu, u pirijilis, u xinxa, u salinu, u patata, u calabacita, u turtulhu, u barrenha y apareceu u gaspachu.
Dispois foran chegandu u milhará, u farinha, u panis, u parganas, u farelu, u tarronis, u rusquilheiru, u xiringueiru, u patatera, u calostrá, u madalenu, u tomatá, u cucharón y u rebanha.
Mais tardi chegaran u león, u zorra, u bichu, u cocu, u sapu, u ranas, u gatu, u ratu, u ratadu, u mochu, u muchitu, u pajarinhu, u pulga, u grilu, u colmena, u cachorru, u peceiru, u mosca, u peixi, u galinha, u polu, u ribita, u gralhas, u borregu, u carneiru, u cabrita, u chivita, u churrulí, u zaragata, u pipis, u moiru, u zamarras, u tíu pintamonas, francisquillu, u manhegu, u acebanu y faxardu.
Pura prazuela apareceran cu chambra y chalecu, banda, zajos y borceguís; u pixoti, u quinitu, u parreiru, u culeirana, u pestana, u turradas, u manoju, u botas, u malacachín, u mansu, u gordu, u templau, u colorau, u foru, u pelegrín, u fandanguitu, u simonis, u botanina, u charelas y u regatu.
Enu corchu relinchó Nocilas ojestu y ena devesa o porta arriba le contestó u Pablu feu. As duas partías se juntaran enu callejón du relhanu y formaran a trafusca entri u chilha, u venenu, u carbuncu, u badalu, u xarpilheira, u sacana, u cadalsu, u pinhonis, u serranitu, u valenti, u tachuelas, u brocas, u rujitu, u macías, u matafacas, u gaixas, u negru, u escarda, u rabiau, u pichi, u pinchi, u cutelu, u navalhas, u punhalá, u trabucu, u malhetu, u palancas, u bolas y u matanzú; y du resultau da refrega y enu escuru du callejón solu quedaran u tortu, u calaboba, u tamancas, u malvas, u cabila, u coixu, u mancu, u ruín, u bunecas, u chiquenu, u xaguarzu, u pelau, u rasquinha, u juanilhu, u chaspún, u refi, y u cagalhón.
Puru que dicían dispois, relinchó enu purtilhu u marmetu, y enu forti le contestó u nivelrrús y s´ajuntaran enu lhanu da igresia, u carchas, u manxiú, u barrichi, u pajaris, u pichorrón, u barroca, u canhón, u capitán, u lesnas, u birutas, u barbas, u lecherenga, u luceru, u malaleche, u brochas, u larai, u lilai, u ganducilas, u ginés, u medialuna, u cazuelas, u ferru, u mingacha, u puchera, u trunfas, u sarafana, u roixu, u maura, u gabrielinhu, u andresinhu, u tragaleguas, u chaperus, u chamberu, u xirineu, u tarolas, u piriquinu, u federicu, u cadinu y u pedrogu; y du resultau solu quedaran u barriguilha, u saltitus, u pichichi, u finu, u escucha, u ripanzus, u chatu, u netu, u capu, u chocu, u penitas, u cacharru, u peseta, u perrachica, u lindu, u laganhas, u canhotu, u misacamas, u curinha, u palicha, u panzas, u siquitu, u mangas, u prenhau, u mamadeus, u frescales, y u caraputa.
Otras partías relinchaban ena calhijinha ponti y en caganchas y entre elis estaban u guerrilha, u chapas, u latas, u faldiquirinhas, u valeriu, u mueblis, u changarra, u charaletu, u dominica, u farinheira, u chicatu, u taralentas, u centolha, u paqueti, u rambolha, u pelilhus, u romeritu, u botana, u penachu, u vilhalba, u cambulhu, u quica, u pirulus, u barrelas, u molina, u agusta, u valencianu, y u lenteixa.
Duranti a refrega se le queiu a escarapela au guarda carambelu y ensiguía a falhó u miracielus.
Quedan inda mutus motis que mental y non us digu purque alguén le sentaría mal.
Logu un pequenu qu´había vindu du campu, tiró un´a albarca, s´apagó u candil, s´acabó u bailu y as xiringas y pur non escutal us conselhus foran tos a paral au corral du concelhu.
Y acabandu vus pidu disculpas si algún s´ha ofendiu, pero istu é du poicu que eí he vistu y du que he uivíu.

Salvaleón.

2011-04-20T10:47:00.003+02:00

Hoxy doy a cunhocel un trabalhu d´ Enrique Burguet Fuentes.

Enrique vivi en Oviedo; sua madri é valverdeira y desdi qu´era un zagal, ha sintiu un´a especial atracción pur esti pequenu rincón extremenhu.

Sufri cuandu ven y comproba qu´han desaparecíu, o non se conservan cu respetu que se merecin; certas reliquias o patrimoniu que falan, en silenciu; da nosa procedencia.

Asina, un día me contaba comu le gustaría que nacera un´a generación de valverdeiras y valverdeirus que se comprometeran valorando y procurandu estudius adecuaus pa protegel monumentus comu u nosu ponti, de "probabli fábrica romana y pretís bajomedievais;" sobri a riveira de arreganhacús, ena que pur u anu de 1570, apareceu oiru.

Le gustaría que desaparecera u asfaltu du ponti y das suas inmediacions, pur a sua importancia comu monumentu civil de tan antigua fábrica.

Estas preocupacions le movin a investigal y a escribil cu pasión y respetu sobri u nosu pasau.

É fiel colaboradol da revista de tirá nacional: DETECCIÓN & MONEDAS.- LA PRIMERA REVISTA NACIONAL PARA LOS AFICIONADOS A LA DETECCIÓN Y COLECCIONISTAS.

A sua participación nesta revista é fundamentalmenti en calidai de numismatólogu, publicandu artículus muy especializaus y muy ben documentaus sobri u tema.

De cuandu en cuandu publica otrus de investigación histórica comu é u casu qu´agora vus presentu.

Cu permisu, tantu du propiu Enrique Burguet, comu cu a inestimabli aportación da senhora redactora da revista, Dª. Anna Ventayol; he subiu a ré de redis, enun solu documentu pa u vosu disfruti, u trabalhu que publicó, baju u títulu: SALVALEÓN: Ciudadela fantasma y enclave legendario; dividiu en tres partis, que apareceran enus númerus 12, 13 y 14 da revista.

Cuandu leáis u artículu completu vus daréis conta cuantu apreciu, respetu, horas invertías y carinhu mostra Enríque pur esti enclavi nosu de Salvaleón.

A mí, personalmenti; me gustaría qu´a lectura desti trabalhu encendera un´a pequena lu enus vosus corazons qu´alimentara un´a chama mais grandi pa iluminal u caminhu que mus levara hasta a conservación y posta en valol du nosu mágicu SALVALEÓN.

ENLACIS:

U documentu de Salvaleón se encontra subíu enun servidol gratuitu y ademais pesa 30 Mb.; pur isu tindis que tel paciencia si tarda varius minutus en bajarsi au vosu equipu. Tamén dependi da vosa velocidai de conexión.

SALVALEÓN: Ciudadela fantasma y enclave legendario.

DETECCIÓN & MONEDAS.- LA PRIMERA REVISTA NACIONAL PARA LOS AFICIONADOS A LA DETECCIÓN Y COLECCIONISTAS.

Fotus da muralha urbana de Salvaleón en CastillosNet.

Maite y Andrea.

2011-03-29T18:27:00.002+02:00

Mulheris cu agalhas.

A ilusión que ponhamus enas coisas mus dará a medía dus resultaus.

Un´a destas frías minháns du mes de marzu qu´acabamus d´encetal; cuandu me disponhía a compral u pan tostenhu cu bordas, que tantu me gusta. Maite, simpática lagarteira, integranti da comunidai de bienis “González Carretero, C.B.”, que trabalha a elaboración du pan y a repostería artesana y cu despachu en Valverdi, me dicía cu esa gracia qu´a distingui, “agó estó metía en otru proyectu”.

Si ben ei diba cu as presas propias de chegal prontu au trabalhu, me do un´a corazoná y pur isu le preguntí de qué trataba. Na mais oivil cu qué ilusión me falaba y sabendu, mentras me contaba; que tinha mutu que vel cu apoyu a un´a zagala valverdeira, muy nova qu´enas épocas de mutu jaleu trabalha cu elis, qu´agora está enu paru, y que é madri d´un pequenu de cuatru anus; me pareceu qu´esta historia pur u que ten de humanu y de valenti, debía sel cunhocía, asina que cu permisu delas, quedí pur a tardi, pa robalis un poicu du sei tempu, mentras se disponhían a cargal a furgoneta.

Cuandu cheguí au despachu me encontrí cu Maite y cu Andrea.

Andrea é a valverdeira qu´a pesal da sua tenra edai, é madri d´un pequenu de cuatru anus. Me dici Maite que “é muy boa trabalhaora y a contratamus ena temporá alta”.

Preguntu ei: A vel! ¿cómu y de quén seiu a idea?

Andrea contesta que “mais ben seiu de ela” refiríndosi a Maite. A continuación sigui, nesti casu Maite dicendu: “A idea parti de qu´ena temporá alta temus trabalhu pa ela; us otrus están fijus tos, peru ela solu ena temporá alta, logu ena temporá baixa se vay a calli, purque nun temus trabalhu pa ela, alomilhol algún día a semana qu´estamus mais apuraus a chamamus, peru pa mantenhela nun poemus”.

U casu é qu´Andrea se vía apurá sin trabalhu, a puntu d´acabal u cobru da prestación de desempleu, cercanu u día senhalau pa dali u “sí” a sei noviu enu Juzgau y cu filhu pequenu. To istu le quitaba u sonhu, pur isu diba a vel a Maite de pociu en poicu, cua misma cantarena y preocupación. A conta d´istu sigui Maite: “Mei mariu, un día le propusu: sí ques pois ficel istu, comu un´a idea, a u que ela le respondeu que isu era muy descabellau; pasó u tempu y ela ya te poi contal”.

A vel Andrea, cóntami, diji ei.

Andrea me dí: “Dau us tempus que corrin y vendu que diba a quedarmi sin a ajuda du desempleu, decidí chamal a Robertu -mariu de Maite y sociu da comunidai de bienis- pa quedal cu él, pa vel si había algun´a posibilidai, porque elis sabin que me gusta conducil, y alomilhol pur isu habrán decidiu, pos mira le gusta conducil asina que vamus a probal cua furgoneta que se mova pur us pueblus da serra cu fin de vel que tal se vendin us productus”. De siguíu continúa Maite: “Peru seiamus a boa de Dios, porque non cunhociamus a naidi ¿a que non Andrea?”.

Andrea asevera y continúa: “Hemus díu pur toa a Serra de Gata, Torri de don Miguel, Cadalsu, hemus díu a Cia Rodrigu, agora tamén hemus díu a Moraleja, Coria...”

¿Y que tal vus acolhi a genti?, preguntí ei.

“Sempris hay ishenti cerrá, peru quen valora a calidai du productu y u ve, u acepta muy ben, y cus tempus de crisis y a final du mes qu´u hemus feitu encima y mus ha seiu un tabalhu muy bo ¿a qué sí?, y ademais u levamus muy ben organizau, vamus ponhendu mueblis a quen nun ten istanterías y le vamus colocandu un sitiu especial pa nos”. Me conta Maite.

Pur u que me dicís, - sigu eí - entendu de que vos nun vais abrindu un local en ca sitiu, sino que vais dandu a cunhocel us vosus productus en ca tienda ¿é asina, non?

“Asina é - me dí Maite - nos vamus tamén seleccionandu as tiendas que cuidin u productu, purque nos valoramus u que nos temus, si tu non valoras u que tes, muy dificilmenti t'u van a valoral. Isu é muy importanti ena venta, purque son pruductus qu´us femus cu nosu adeiti d´oliva da Serra y a us que u femus mus gusta mutu que se cuidi a calidai y nun é pa cualquel sitiu. Sitiu dondi hay desordin esti productu nun poi entral”.

Andrea preocupá y lamentándusi to u día cu paru, nun u vía comu un´a solución de futuru; asina qu´a proposta que le ficeran a través de Roberto, vendu que le daba a posibilidai de cunducil que é un´a das coisas que mais le gusta du trabalhu. U que de primeiras había vistu impusibli, cua ilusión que ten pur sel du círculu enu que se encontra casi toas as minháns na mais levantarsi y asomarsi au sei balcón, le do forzas pa implicarsi y propusu a comunidai que ela se feia autónoma enas horas de pur a tardi, pa ficel u trabalhu de repartu. Istu me treia a memoria u libru “TU GANAS YO GANO. Como resolver conflictos creativamente y disfrutar con las soluciones”. A forti ilusión d´Andrea había moviu a ésta a punhel da sua parti pa que a empresa qu´a contrata temporalmenti le fora milhol, dandu a posibilidai d´abril u mercau a comunidai cu que agora, sin habelu pensau, resulta que nun solu a contratarán a ela pur as minháns ena panadería, sino qu´esta forza de sel pa dientri d´Andrea y du que representa Maite, ha feitu que se necesiti mais genti ena empresa pur as minháns pa dar abastu a demanda. Us nosus maioris mus dicían que “a unión fai a forza...”

Y dici Maite: “Solu pur tel ganas, tes a metai, peru pur contra si nun crees enu qu´estás fendu é impusibli de realizalu. A ilusión nunca se ten que perdel y vamus, si sai arriba, ela ten un pequenu y ten que luchalu, purque us cubardis son us que se rindin; pa mí pur u menus”.
Continúa Andrea: “E verdai que soy muy nova, peru ya tenhu un mininu de casi cautru anus, asina que hay que tiral pa dientri, pur u mininu y por nos y por tos...”

Agora Maite, sigui: “Aunque hemus empezau sin mutu apoyu, nun cree enu nosu proyectu casi naidi, esperu que saia to ben. En Andrea, nun cree casi naidi en ela, peru ei soy un´a das poicas que creen en ela y pur isu y comu u “non” ya u temus peru u “sí” vamus a buscalu...” Y continúan as duas que se entremezclan as suas falas y me pidin que, si queda espaciu pa punhel ena crónica, a elas les gustaría que se pudera nombral a toa “ishenti”, pa Maite, “genti” pa Andrea; que as han acolhíu y han abertu as portas dus seis negocius y reservau un espaciu enus seis locais, pa dal a cunhocel esta rica repostería, feita cu nosu acieti da Serra, delicia que tan ben sabi purque se fai cu tan grandi corazón. Soidi.

A Fala enu Senau.

2011-01-13T19:25:00.010+01:00

U pasau anu, cuandu se tramitaba enas Cortis u novu Estatutu d´Autonomía d´Extremadura, u BNG registró un´a enmenda cua que solicitaba que se recunhucera y protegera A FALA enu novu Estatutu.
Agora, enu Senau volvi a sel a palestra u tema d´ A FALA, cuandu us medius de comunicacions se facin ecu da defensa qu´ hoxi diba a ficel u "Grupo Parlamentario de Senadores Nacionalistas", ena Comisión General de las Comunidades Autónomas, cua enmenda sobri u recunhucimentu oficial de A FALA y du PORTUGUÉS d´Olivenza nesti novu Estatutu.
Sobri u tema en cuestión existin opinions encontrás, tantu sobr´a sua procedencia, asina comu sobr´a forma en que debemus escribil esti patrimoniu que ya foi protegiu pur a Junta de Extremadura medianti u Decretu 45/2011, de vinti de marzu.
Si ben se promovin estudius y debatis sobr´a procedencia, permanencia y proyección d´ "A FALA", us lugarenhus y lugarenhas, a genti de a pe fai u que fizu sempris que é falal.
Nun creu qu´enus ayuntamentus dus tres lugaris falantis existan peticions de pesu, promovías pur us seis vicinhus, ben a nivel personal, medianti recolecta de firmas o a través d´asociacions constituías enas que se pida u que genti de fora, enu nosu nomi a vindu ficendu notrus niveis.
Nesta bitácora encontráis enlacis que vus levan a alguns dus mutus estudius du que generalmenti se chama A FALA. Ei a chamu XALIMEGU, cuas tres variantis manhegu, lagarteiru y valverdeiru. Mais comu volvi a estal enu candeleiru u tema y tendu en conta un´a petición anónima qu´a modu de comentariu quedó adiel engarzá ena entrá anteriol a ésta; voy a punhel aquí as últimas noticias digitais das que tenhu cunhucimentu; asina comu u textu íntegru du folhetu de José Luis Martín Galindo, cu títulu "ESTRATEGIA DEL NACIONALISMO GALLEGO EN EL VAL DE XÁLIMA...O LAS ACCIONES PARA LA ABSORCIÓN LINGÜISTICA Y CULTURAL DE ELJAS, VALVERDE Y SAN MARTÍN DE TREVEJO". Obra que consideiru de lectura obligá pur a cantidai de información que facilita sobr´un tema comu u qu´agora se acaba de debatil y que poi ajudal a aquelas persoas que queiran tomal partiu.

NOTICIAS DIGITAIS:
Oportunidad para "a fala" y el portugués de Olivenza.
Los nacionalistas defienden en el Senado el reconocimiento oficial de "A Fala" y del portugués de Olivenza en el Estatuto de Extremadura.
Los nacionalistas quieren que "A Fala" sea lengua oficial en el nuevo Estatuto.
El Estatuto de Autonomía recibe el visto bueno de la comisión del Senado.
El Senado da el impulso definitivo al Estatuto de Autonomía.

U TRABALHU DE JOSÉ LUIS MARTÍN GALINDO.
ESTRATEGIA DEL NACIONALISMO GALLEGO EN EL VAL DE XÁLIMA...O LAS ACCIONES PARA LA ABSORCIÓN LINGÜISTICA Y CULTURAL DE ELJAS, VALVERDE Y SAN MARTÍN DE TREVEJO.

REAL ACADEMIA DE EXTREMADURA DE LAS LETRAS Y DE LAS ARTES.
Informe del Dr. D. Antonio Viudas Camarasa de la Real Academia de Extremadura sobre A Fala, habla fronteriza con Portugal en la provincia de Cáceres.

DECLARACIÓN DE A FALA COMO BIEN DE INTERÉS CULTURAL.
Decreto 45/2001, de 20 de marzo.

Concertu da Capilla Extravagante.

2010-12-30T18:51:00.021+01:00

Si u día 27 de Febreiru, us Ministrís da Serra, baju a dirección du nosu paisanu Manuel Pascual Gómez, mus deleitaran cu magistral concertu de música sacra dus siglus XV y XVI.

Adiel tardi, ena Igresia Parroquial du nosu lugal, de novu arropaus cu impresionanti ábsidi trazau pur Pedro de Ybarra, levau a bo términu cuas mágicas mans du mestru canteiru Sancho Ortiz y baju a dirección, tras a morti de Pedro de Ybarra; de Juan Bravo, alá pur u siglu XVI y sobri u altar que presidi u retablu maiol, du siglu XVII, contratau pur Diego de Salcedo cua ajuda (aixua) du ensambladol Antonio González Ramiro; volveran us Ministrís da Serra, nesta ocasión bautizaus comu "LA CAPILLA EXTRAVAGANTE"; a invitarmus a viajal (viaxal) enu tempu y enu espaciu ficendu un recorriu pur us vilhancicus, rescataus de melodías gregorianas anónimas, du Cancioneru du Palaciu Real dus Reis Católicus, asina comu de recunhocius compositoris europeus y das obras mais aplaudías du Renacimentu espanhol.

Desta maneira, sentaus enus bancus da Igresia y absorvius pur as envolventis notas da chirimía, das cornetas, u sacabuchi, a percusión y a angelical vo da nova solista Linde Van der Veken; ficemus un placenteiru viaji pur us siglus du X u XVI.

U nomi "La Capilla Extravagente", comu se dí enu programa que mus facilitaran a entrá du concertu; recorda u corpu de músicus que se desplazaba d´un lugal a otru en busca de mecenas que les dera trabalhu.

Pur entoncis, suponhu qu´us mecenas serían as Parroquias, Obispaus y us palacius reais. Asina comu as familias cortesanas, de realengu y rancia nobreza qu´us chamarían en ocasions especiais comu bautizus dus seis retonhus, casamentus...

Estis músicus eran us ministrís, cunhocius según a parti de Espanha ondi se encontraran comu: Menistriles, Ministriles, Ministrils, Ministrers. Ven das palabras latinas "ministerium y minister" y é un´a continuación du qu´ena Edai Media chamaban juglaris y trovadoris. U nomi evoluciona cu pasu dus anus, de maneira qu´a partil du siglu XVI u aplicaban pa aquelis que ficían soal instrumentus de ventu o de meira (madeira).

Mus ofreceran de postri u vilhancicu populal valverdeiru, que ei ya non recordaba; denominau: EI VÍ U MININU JESÚS.

As letras das cancions popularis tenin mutas variacions. Ca persoa según se creia que s´acordaba o según a sua propia inventiva diba incorporandu versus. Pareci sel qu´a letra du vilhanciu "Ei ví u mininu Jesús" que mus cantaran, era un´a versión de Catalina, madri de Manuel Pascual. Hay quen pensa que a sua madri tamén tuvu mutu que vel cua música du vilhancicu.

Si queréis sabel mais desta actuación asina comu de ca un dus que forman a Capilla Extravagante aquí tenhu, a vosa disposción, u programa:

LA CAPILLA EXTRAVAGANTE.

Si vus interesa u vilhanciu, clicandu sobri u enlaci u tindis:

VILHANCICU: EI VI U MININU JESÚS.

Tamén he editau esti pequenu y artesanal vídiu da actuación, que nun chega a 10 minutus, enu que recolhu dois vilhancicus; un gregorianu y u valverdeiru. U he feitu de forma artesanal, cua cámara de retratus y sin trípodi. Pur isu, ni u soniu, ni as tomas, ni u resultau final son profesionais; u que me obliga a subilu a alta resolución y pur isu, si tarda en cargal; será milhol que dejéis primeiru que se cargui u compretu y dispois velu. Suponhu que sabréis entendelu.

Aproveitu pa deseal a toas aquelas persoas que vus paséis pur aquí, un anu 2011 cheu de muta armonía, pa, abundancia, equilibriu, soidi y felicidai.

U Val de Xálima y a sua fala.

2010-12-11T14:01:00.025+01:00

Esta obra "U VAL DE XÁLIMA Y SU FALA. PAISAJES DE MI VIDA" a fizu u nosu paisanu Luis Rafael López, participandu enu Programa: Paisajes de nuestra vida, dentru du segundu ciclu da "Aula de la Experiencia", da Universidai de Huelva, duranti u pasau cursu 2009-2010 y baju a coordinación du Sr. Catedráticu
d´aquela universidai D. Jesús Monteagudo López Menchero.
Luis me fizu acreedol un´a copia y me quedí prendau d´ela. Muy a pesal du propiu autol, que antis de que ei leera ni siquera u títulu; cu muta humildai me dicía qu´a treia purque ei había mostrau interés en cunhocel a obra, cuandu él andaba recopilandu datus y sólu le rondaba ena cabeza unha vaga idea du que podría
sel u resultau final.
Me quedí prendau, purque intuía desde ya fai algún tempu que Luis tinha un´a predisposición innata pa contal historias que inda nun había explotau.
Si ben u trabalhu nun é propiamenti un relatu d´aquelis tempus que le tocó vivil de pequenu, sí é un´a forma valenti, meditá y magistral de expunhel fora du nosu lugal y dientri de persoas cultivás, as características físicas, a flora y a fauna, us aspectus mais importantis da geografía e hidrografía; notas relativas a nosa historia, mezclás cuas suas vivencias personais, un´a muy ben documentá exposición sobri a NOSA FALA. Toa a obra adorná cu mutas y muy boas fotus y terminandu cua palreira entre dois velhus, que perteneci a un trabalhu que mei difuntu padri tituló: "Du que en otrus tempus foi Valverdi".
Te doy as gracias Luis, primeiramenti pur u detalli de punhel u brochi cu relatu de mei padri, tamén pur darmi u permisu pa subil a copia a ré de redis cu fin de qu´aquelas persoas que queiran, podan bajala pa sua consulta.
Te sigu animandu pa que algún día mus sorprendas cu esa gracia especial que tes pa plasmal as tuas vivencias de zagal enu nosu valverdeiru.
Nesti bolg tes a porta aberta.
A copia se poi bajal, clicandu encima desti enlaci:
U VAL DE XÁLIMA Y A SUA FALA.
Si sintís curiosidai puru nosu vali, Valverdi, a nosa fala y a sua genti, vus animu a que eitéis un vistazu, tamén podéis bajala pa consulta. Si utilizas parti de ela pa un trabalhu tei, u mínimu que pedimus é que faias referencia a ela y u sei autol.

Pelea entri duas mulheris.

2010-12-08T13:32:00.007+01:00

Le dicía un´a a otra:
"Anda pai fedionda,
que nun se poi estal u tei lau
purque cheiras qu´atrisondas".
A segunda respondi:
"Pa isu tu que eris un´a foreira,
qu´u tei lau nun se fala mais que de petrineiras.
Que si a petrina de fulanu,
que si a petrina de citanu."
Replica a primeira:
"Isu pa tí que te gusta mais cu pau.
Que en cualquer petrina te gustaría metel a man".
Apareci un´a terceira y pa conformidai de un´a d´elas dicía:
"Cálati mulhel nun le faias casu a esa chispoleta
que nun sabi ni facel puntu pa un´a calceta".

Esta pequena obra inédita perteneci a mei difuntu padri Segundo Corredera.
A vecis se le vinhan coisas a cabeza d´as suas viviencias de pequenu fundamentalmenti, que escribía enu reversu das folhas dus calendarius y otrus papeis de utilidai ya caducá, pa reciclalus.
Fai mutus anus, ena revista ya desaparecía AGATAE; publiquí un artículu utilizandu otra composición sua, que subiré mais adientri, medianti a que, cun muta maestría diba ficendu relación dus motis du lugal. Vistu u interés de varias persoas du lugal, le pidí y colaborí cu él editandu un´a cinta de casseti cua dita relación.
Algun´a otra comu a palreira entre dois velhus a insertí enu anu 1984 a modu de "voz en of" enu vídeu: "VALVERDE DEL FRESNO - HISTORIA VIVA DE UN PUEBLO" U autol se chama Domingo Berrío, filhu de paisanu nosu emigranti, que non vivin ca agora. Desta obra se envió, nun faira inda dois anus, un´a copia a filmoteca de Extremadura.
Destas pequenas composicións tenin copias linguistas que investigan sobri a nosa fala, comu Xosé Enrique Costas y Enrique Gargallo, entre otrus; a us cuais agradezcu de corazón que hayan feitu mención delas en suas obras.
Enu esencial he respetau u escritu de mei padri. Ena estructura du textu he incluíu, pa dali mais movimentu; as entrás de ca un´a das mulheris cuandu van a respondel. En cuantu a grafía, he adaptau algun´as palabras a forma comu ei, personalmenti, creu que deberíamus escribil.
Avisu a navegantis qu´esti blog está vivu y que según voy acaparandu mais lu, voy modificandu us vocablus pa adaptalus as lucis que me van alumbrandu.
Tamén encontraréis otrus que non tenhu claru comu escribilus inda agora y pur isu en ca artículu, inclusu enu mismu artículu poi aparecel de varias formas.
Disculpei estas incertidumbris. Pensei que mus encontramus enu balbuceu du qu´amihán poi sel u nosu Xalimegu escritu.

As Ellas. A procedencia du sei nomi.

2010-07-23T22:46:00.012+02:00

Tenin claru us investigadoris qu´ena prehistoria u territoriu das Ellas estaba habitau en razón a que existin restus arqueológicus que asina dan fé destis poblamentus tan ancestrais.Enu que creu que nun se ponin d´acordu é ena procedencia du nomi du lugal.

Temus que tel en conta que u nomi apareci, pul u menus; de toas estas maneiras escritu au largu da historia: Elgiam, Elgias Elyas, Elxes, Herjes, Heljes, Herjas, Heljas, Eljas.

Veamus alguns ejemplus.

Pa Domingo Domené Sánchez, enu sei libru “HISTORIA DE LA SIERRA DE GATA”, u lugal das Ellas conta con toas características pa vil d´un poblau vetón y fundamenta a sua postura cua nota 29 escrita ena página 20 du libru dicendu: “Aunque casi todo el mundo (BERJANO, CANILLEROS, VELO Y NIETO,...) identifica a Eljas con Ergastulum, como muy bien dice FRADES GASPAR nadie explica de "dondi sacan tal nomi". Sabemos que existía una gens, algo así como una tribu, llamada Aelciocum (SÁNCHEZ MORENO, E.: Vetones: historia y arqueología de un pueblo prerromano. Madrid, 2000, pág. 233) que podríamos traducir como de los Aelcios, ¿pudieron estos Aelcios vivir en un lugar llamado Aelcia, de donde derivaría Eljas?. En la Edad Media a esta localidad unas veces se le llama Elgias y otras Elyas.

Mais adientri escribi qu´u primel obispu da Ciai (Ciudad Rodrigo), D. Pedro da Ponte, foi confirmau cua bula du papa Alejandro III, ena que se citaban monasterius comu u de “Eltios” que estis monasterius se tenin que entendel comu pequenas igresias pa prestal asistencia religiosa us pastoris qu´anduveran pul estas terras; considerandu qu´u nomi de “Eltios” debía de tratarsi d´un error de escritura cuandu se quería dicel “Ellias”, atravéndusi pul u tantu Domené a dicel que u tal monasteriu se refería a Eljas. Y continúa cu que transcribu da sua man: “Creemos que ese monasterio pudo estar en el paraje conocido como San Miguel, en el cercado de “El Rubio” donde la tradición local dice haber existido un poblado, creencia que se ve confirmada por el hallazgo de sillares de muy buena calidad, fustes de columnas y un sepulcro antropomorfo; está además próximo al llamado Camino Real que une San Martín de Trevejo con Valverde del Fresno”. Y finaliza, pa dal mais forza a sua teoría que: “Todavía hoy, los habitantes de Eljas cuando hablan de su localidad la llaman, fonéticamente, As Ellas, bastante parecido a las Ellias que proponemos como nombre correcto en la transcipción de la bula papal”.

Florencio-Javier García Mogollón enu sei libru recén editau baju u títulu: “Viaje artístico por los pueblos de la Sierra de Gata (Cáceres). Catálogo monumental.” Dici ena página 104; copiau au pé da letra: “Según opina Paredes Guillén, durante la dominación romana se llamó Ergastulum, que significa cárcel de siervos, de donde derivaría el nombre actual”.

Florentino Parra Iglesias enu sei libru “En el confín de Sierra de Gata”, y tendu en conta u ditu pul Paredes Guillén, deixa enu airi a probabilidai bastanti aventurá de que u gentiliciu “lagarteiru” pudera vil de Ergastulum. “Ergas…ergasteros, lergateros, lagarteros…¿Quién lo sabe?”

Enu privilegiu de confirmación, otorgau pul u Rei Fernandu III “u Santu”, ena fecha de 2 de Abril de 1231, cu que confirmaba us fuerus de Salvaleón; cuandu vai anotandu as lindis du términu de Salvaleón, apareci: “…quomodo vadit recta linea ad Elgiam, exinde per Elgiam ad sursum usqued ad Portum de Ladrones, quomodo dividit cun Navas Frias…”

Pul otru lau, enu sei magníficu y profusamenti documentau traballu sobri SALVALEÓN, publicau u anu pasau enus númerus 12, 13 y 14, con fé de erratas ena página 58 du númeru 15 da revista DETECCIÓN & MONEDAS, u numismátólogu e incansabli investigadol da historia desti u nosu queriu rincón, Enríque Burguet Fuentes, recollía unha leyenda que, según él; se ven contandu de sempris enus fogais y u calol dus braseirus y das chimeneas. Vus anotu u que escribi ena página 15 da publicación 14 de aquela revista:“que el final de Salvaleón se produjo durante una guerra con los vecinos portugueses de la raya, y, que a medida que los portugueses, iban ganando la contienda, los hombres de Salvaleón, quedándose al frente de la lucha, oportunamente, en un último intento de salvación de sus intereses, optan conveniente, dejar escapar a sus mujeres y niños, al pueblo de Eljas, pueblo al que desde entonces se le llamará “las Ellas”, por ellas, aquellas mujeres que huyeron de Salvaleón para refugiarse allí, en las Eljas, por ser el lugar en aquellos instantes, más idóneo y seguro”.

Medianti Decretu de 10 d´Octubri de 1749, u Rei Fernando VI promulgó a creación du Catastro de Ensenada, cu fin de leval a cabu unha reforma fiscal pa sustituil as complicás e injustas rentas pruvinciais pul un solu impostu, a “Contribución Única” que nun se chegó a leval a cabu.

Nesi Catastro de Ensenada, en relación cua villa das Ellas, comenza asina: “En la Villa de las Heljas, del Departamento de la de Alcántara, a veinte y tres días del mes de Agosto de mil setecientos cincuenta y tres años…”

Pa finalizal voy a transcribil u que se dí sobri as Ellas enu “DICCIONARIO GEOGRÁFICO-ESTADÍSTICO-HISTÓRICO DE ESPAÑA y sus posesiones de ultramar”. Se trata de unha obra que recolli información de toas as poblacións de España, foi editá entre 1845 y 1850 pul Pascual Madoz Ibañez y comprendi 16 tomus.

Ena página 469 du tomu VII, editau enu anu 1847 apareci u que sigui: “Este pueblo suele llamarse Herjas y Heljas, variando así la forma de escribirle. En 13 de noviembre de 1340, estando el rey en Valladolid, dio privilegio de donación de la aldea, entonces de Coria, Herjes, al maestre de la Orden de Alcántara Don Gonzalo Pérez y a dicha Orden, con sus términos é con los pobladores que son e fueren, é con la justicia con todos los pechos é fueros é derechos que nos y abemos é aber debemos…”

Quedu aberta a porta au debati, pa que toas aquelas pesoas que lean esti artículu se sintan libris de sacal as suas propias conclusións y vus doi as gracias pul habel chegau hasta aquí.

Denuncia de José Luis Martín Galindo.

2010-06-12T09:36:00.003+02:00

A mediaus de Maio, D. José Luis Martín Galindo, gran defensol da fala dus tres lugaris que eí he bautizau comu Xalimegu, me envía unha carta cun varius ejemplaris du sei folletu "LA ESTRATEGIA DEL NACIONALISMO GALLEGO EN EL VAL DE XÁLIMA...o las acciones para la absorción lingüistica y cultural de Eljas, Valverde y San Martín de Trevejo".
Dici Martín Galindo que publicó esti folletu pa denuncial y desentrañal as actividais du Bloque Nacionalista Galego(BNG) en colaboración cu ayuntamentu de San Martín de Trevellu; según se dó conta cuandu víu ena prensa qu´u BNG a mediaus de Diciembri du anu 2009, había presentau unha enmenda enu Congresu dus Diputaus au proyectu de reforma du Estatutu d´Autonomía de Extremadura, que se tramita enas Cortis de España pidindu u recuñocimentu da Fala.
Comenza u sei traballu cua pregunta "¿Por qué publico este folleto?"
Contestandu que, enu anu 2007 envió au Presidenti da Junta de Extremadura, grupus parlamentarius da Asamblea de Extremadura y a otras Institucions extremeñas, un informi sobri as pretensions du nacionalismu galegu enus tres lugaris. Pretensions que se confirman cu registro pur parti du BNG enu Congresu dus Diputaus, da enmenda pa que se recuñoza y proteja "A Fala" enu novu Estatutu de Extremadura que se tramina enas Cortis.
Enu folletu publica as actividais qu´us nacionalistas galegus venin desarrollandu desde 1990, pa colonizal linguisticamenti y culturalmenti u nosu territoriu.

U escudu cuas armas dus Duquis de Medina de Ríoseco.

2010-05-28T18:28:00.012+02:00

Hasta hoxi, a casa, na calli Ramón y Cajal, da familia Frade Claros; figura nus folletins comu casa señorial du siglu XVIII, "Casa de los Frades" cu "Escudo de los de Medinacelli", y asina aparecía tamén ena ficha du inventariu du patrimoniu históricu extremeñu da Junta de Extremadura.
Primeiru, pensu que deberíamus de chamala casa de los Frade; o casa dus Fradi quitandu a "s" du final, porque us propietarius levan u apelliu "Frade" en singulal.
Falandu du escudu, tamén teñu as miñas diferencias cu que se ven dicendu y escribrindu.
Levu cerca de dois anus estudiandu sobre esti tema y d´unha coisa estoy seguru. As armas du brasón non representan u linaji da Cerda. A esti linaji, us Reis Católicus, na persoa du V Condi de Medinaceli, chamau don Luis de la Cerda, nu anu 1479 otorgaran u títulu ducal. Duquis de Medinaceli.

Siguindu a ciencia heráldica, u brasón dus de Medinaceli
é d´esta guisa: "Escudo cuartelado: 1 y 4: partido de gules con un castillo de oro aclarado de azur y de plata con un león rampante de gules coronado de oro (Castilla y León); 2 y 3: en campo de azur tres flores de lis de oro, bien-ordenadas (Francia)".

Pa entendermus falandu du lugal; us de Medinaceli, usan un brasón que está dividiu en cru. Enu primeiru y enu cuartu campus temus un castelu amarelu sobre un fondu colorau y un león tamén colorau sobre fondu brancu. Enus campus dois y tres temus tres froris de lis, ben colocás encima de un fondu azul. Miréi a figura 1.
Comu A CRÓNICA me encorseta u traballu, sin mais vo a u meollu, non sin antis ficel patenti u mei agradecimentu a Inmaculada y Pacu que m´ abriran sin niñunha traba, as portas desta singulal casa y dejaran que estudiara sin acotarmi u tempu a vasta retahíla de documentus que puseran enas miñas mans y que foran certeirus pa darmi a lu sobre u tema.
Si mus fijamus na segunda figura, y copiamus au pé da letra, da página 83 du Diccionariu dus hermanus García Carraffa, tomu 29, edición de 1956; vemus: "La rama de los Duques de Medina de Ríoseco usa las armas del Infante don Fadrique, Maestre de Santiago, que son: Escudo mantelado 1º y 2º, de gules, con un castillo de oro, y la manteladura de plata, con un león rampante de gules".
En "román paladino", escudu mantelau é aquel que enu mediu de arriba empeza unha raia vertical que mentras baja se parti en duas líneas tortas que buscan us dois laterais du escudu.
Us duquis de Medina de Ríoseco venin da segunda rama real de Castilla. Esta rama a encabeza u fillu que tuvu u Rei D. Alfonsu XI cu doña Lionol de Guzmán. Esti fillu se chamaba don Fadrique, Mestri da Orden de Santiagu, que foi mortu pur ordin de sei hermanu u Rei don Pedru I "u Cruel". D. Fadrique foi padri de dois fillus y unha filla. A sua morti, sigui u linaji sei fillu, que se chamaba Alonsu Enríquez y que tuvu 12 vástagus entre fillus y fillas.
Cu esta proli y sendu genti tan principal tuveran que desparramarsi mutu.
Enu catastru de Ensenada que figura nu archivu históricu municipal de Valverdi du Fresnu apareci D. Antonio Henríquez, viciñu de Salamanca, que percibía un censu impostu sobre us bienis de propius du nosu lugal.
Nu mismu catastru figura D. Joseph Orttigosa, cuñau de D. Antonio Henríquez que gañó un pleitu na Real Audiencia de Valladolid pur u que, entre otrus bienis du sei difuntu sogru D. Antonio Nicolás Henríquez de Guzmán, le deran a casa sita ena calli da Igresia du nosu lugal, pur sel curadol dus seis cuñaus, Enríquez; menoris de edai.
A familia Frade ten un inventariu tasau, pa dividil y repartil us bienis que dejó un antecesol da familia; u doctol D. M iguel Carrasco Alonso, que morreu en 1864. Nesti documentu aparecin cubertus, entre elis seis cutelus cu mangu de prata que levan grabau u nomi D. Antonio Henríquez.

Falandu de novu du escudu. Enu da casa dus Fradi, figura 3, cus retoquis de colol qu´ei fici sobre a fotu, siguindu a definición dus hermanus García Carraffa; vemus cu león mira pu otru lau, que será debiu a qu´u canteiru u copiara de un sellu o anelu, ondi as armas se graban u revés.
De toas as maneiras, a casa está ondi antis pudera chamarsi a calli da Igresia, ten escudu cuas armas dus Enríquez y está timbrau cu coroa.
As coroas igual qu´otrus elementus da heráldica son diferentis si se fala de marquesis, condis o duquis. Nesti casu, a coroa que timbra u escudu da casa dus Fradi é unha coroa ducal.
Resumindu, u escudu leva as armas dus Enríquez de Castilla y enu timbri unha coroa ducal que mus fala dus duquis de Medina de Rioseco y non dus duquis de Medinaceli.

"Entre línguas".

2010-05-19T00:15:00.004+02:00

U pasau 15 de Maio, día de San Isidru, as oitu y media da tardi, ena sala du Centru Social Integrau, situ ena Calli Levadiña, y formandu parti dus actus du 3º Xálima Cultural, qu´organiza u Ayuntamentu de Valverdi du Fresnu, du 14 au 21; foi presentau pur Joao Aveledo, Eduardo Maragoto y Vanessa Vila Verde, autoris da obra; a película cu títulu: ENTRE LÍNGUAS.
Nesta obra sayin falandu viciñus de lugaris fronterizus cun Purtugal, das pruvincias de Zamora, Cacris, y Badajó; entre elis, viciñus das Ellas, San Martín de Trevellu y Valverdi du Fresnu, dandu as suas opinions de pur qué falamus asina y de ondi mus poi vil esta fala.
Tamén cua película, proyectaran un documentu que termina cua entrevista feita a Xosé Henrique Costas, Profesol da Universidai de Vigu; principal defensol da procedencia galega da nosa fala, quen manifesta qu´a nosa terra foi poblá pur galegus y leonesis, us cuais se mezclaran cuas persoas que pur entoncis vivían nesti valli.
A obra ten duas partis. Unha primeira oblea (CD), a modu de reportaji recorrendu us pueblus fronterizus y unha segunda incluindu entrevistas que quedaran fora du reportaji y chaman us autoris "documentos". Si alguén tuvera interés pur esta obra, a tenin posta a venta.
Aquí siguiu pudeis vel unha mostra du reportaji.

Otrus Idiomas

2010-05-05T00:11:00.008+02:00

Tendu comu pretestu a celebración du día du libru; a finais du pasau mes d´Abril; a Escuela Oficial de Idiomas de Plasencia levó a cabu pur tercel anu siguiu a actividai de Talleris: "Otrus Idiomas". Esti anu us talleris foran de árabi, fala, lenguaji de signus y rusu.
Ena Escuela Oficial de Idiomas se ensina alemán, francés, inglés, italianu y purtugués y desean, cu estas actividais, cuñocel y acercarsi a otras lenguas, que son a manifestación da diversidai de culturas da humanidai y baju a premisa de que toas elas tenin u mismu valol, porque toas son unha seña de identidai das comunidais que as falan y acercarmus a elas é chegal a ca unha desas comunidais y sabel un poicu mais de nos mismos; tal y comu me dicía u coordinadol D. Federicu Alonso u 28 d´Abril, día que tuvi u honol de participal enus talleris cua presentación da fala das Ellas, San Martín de Trevellu y Valverdi du Fresnu y as suas variantis lagarteira, mañega y valverdeira, según u lugal enu que se fali.
Ademais de dal a cuñocel a nosa fala y de interpretal cua ajuda da miña paisana Antonia Carrasco Andrade u "diálogu d´unha parella de octogenarius", que perteneci a obra de Isabel López Lajas, nacía en Valverdi du Fresnu enu anu de 1884 y que morreu enu anu de 1967. Obra publicá baju u títulu Seis sainetes valverdeiros, pur Henrique Costas González, - Edicions Positivas - en Febreiru de 1998. Tamén fici pa velu enu tallel da fala, esti videu que he subiu a youtube baju u títulu Otrus Idiomas.

Us Ministrís da Serra.

2010-03-03T21:54:00.003+01:00

U pasau Sábadu, día 27 de Febreiru, a isu das seti y media da tardi, en a Igresia Parroquial "Nosa Senhora da Asunción" asístí au magistral concertu de música sacra dus siglus XV y XVI cun a que nus deleitaran US MINISTRÍS DA SERRA.
Comu reza en u folletu que nus deran antis de comenzal u concertu, us ministrís eran músicus profesionais que a petición de us cabildus das catedrais, as hermandais religiosas o as parroquias, tocaban en distintas celebracions religiosas, así comu en bautizus, bodas, enterrus a petición de particularis.
US MINISTRÍS DA SERRA e un grupu que naci comu idea de u nosu paisanu Manuel Pascual, cun u fin de rescatal aquela velha tradición. Esti grupu musical ademais de revivil un´a antigua profesión descunhocía en estis días, tamén nus deleitan cun us medievais acordis que sayin de instrumentus tan extranhus hoixi pa nos comu son: A espineta, a chirimía y u sacabuchi.
U concertu u titularan "Agenda defunctorum" cun u que conmemoran us 450 anus da morti du compositol extremenhu Juan Vasquez, que naceu en Badajoz a principius du siglu XVI. A Agenda defunctorum e un´a obra de esti autol.
U grupu musical creau pul Manuel Pascual, baju u nomi de US MINISTRÍS DA SERRA u componin:
Linde Van der Veken, que naceu en Flandes y é licenciá en Musicología pul a Universidai Católica de Lovaina (Bélgica).
Jesús Alberto Domínguez Pérez, de Cáciris. Diplomau comu Maestru en a especialidai de Educación Musical pul a Universidai de Extremadura.
Félix Alberto García Hidalgo Barquero, de Don Benitu. Licenciau en Historia y Ciencias da Música pul a Facultai de Geografía e Historia de Salamanca.
Manuel Pascual. Terminaus us seis estudios de Música Clásica, fizu a especialidai en dirección e interpretación da música antigua en u Departament de Músique Ancienne de Toulouse (Francia), dispois en u Conservatoire de Músique de Ginebra (Suiza) y en a Iniversidai suiza "Schola Cantorum Basiliensis". A pesal de sel un zagal novu ten un´a larga carreira musical habendu grabau 8 discus, feitu bandas sonoras en varias películas y obras de teatru.

IV Semana das Lenguas.

2010-02-25T21:38:00.010+01:00

A Escuela de Educación Infantil y Primaria "ALFONSO VIII" de Plasencia, esti anu celebra desde u día 22 de Febreiru hasta u día 26 du mismu mes a "IV SEMANA DE LAS LENGUAS".
U Directol de esta Escuela D. Javier Juanals ha ditu que dandu a cunhucel oitras lenguas y oitras culturas, se ensina a us zagais y as zagalas a convivil en a diversidai y a sabel respetal a oitras pesoas y oitras culturas.
As actividais de esta presente semana se centran na FALA, U COREANU, U ROMANÍ, U ALEMAN y U LENGUAJI DE SIGNUS.
U día 22 de Febreiru se dedicó a FALA y tuvi a enormi satisfacción de participal a u largu de toa a minhán departindu cun us alumnus de ditu Centru.
Comu complementu edití un vídeu utilizandu comu guía de partía un´a presentación que en u 2001 fici pa a Asociación de vicinhus de u lugal.
He subiu un´a versión adaptá pa internet a Youtube que vus pegu aquí bebaju pur si tindis interés en vela.

A u largu de a media hora de u recreu, se ficu nu patiu de a Escuela a Gran Pegá de saludus, que cunsistía en completal un gran mural cun distintas expresión das diferentis lenguas que se tratan en a semana.
Oitras pesoas que participaran a u largu de a minhán dedicá a FALA foran, u Administrativu de u ayuntamentu de San Martín de Trevellu Carlos Máquez y as nosas paisanas Sara e Inmaculada, duas maestras que traballan en a Escuela "Alfonso VIII" y que nus deleitaran cun un´a entrañabli adaptación en FALA, feita pur elas mismas; de u popular contu infantil "CAPERUCITA ROJA".
Si queréis sabel algu mais en relación cun esta Semana, tindis a posibilidai de consultal as nuticias de Extremadura du día 24 de Febreiru, a partil du minutu 13:30 de u vídiu que tamén vus incluyu agora, o ficendu clic sobri u nomi da Escuela que apareci en u comenzu de esti escritu.

Noticias de Extremadura. Informativo Territorial de Extremadura. (24/02/10)

A FALA, UNMA LENGUA ATRAPÁ NU TEMPU.

2010-01-31T16:50:00.007+01:00

A fala unma lengua atrapá nu tempu.
Se trata de un reportaji de Jero Moreno que foi emitiu nu programa "La 6ª. Noticias".

Aquí tes oitru vídeu sobri u Valverdeiru, u Lagarteiru y u Manhegu, as tres maneiras de falal a nosa FALA que ei bauticí na minha página personal sobri u nosu lugal comu XALIMEGU. U bautizu tuvu éxitu. Ya se encontran traballus sobri A FALA na Internet, baju a denominación XALIMEGU.

De noblis valverdeirus.

2009-12-26T22:00:00.006+01:00

U linaji Cid en u nosu lugal.

Mutas vecis, u mei interés en indagal sobri un asuntu determinau ten a sua motivación en as pincelás que sobri u particulal da u nosu paisanu D. Florentino Parra, en us distintus traballus publicaus sobri u nosu lugal y u sei entornu. “EN EL CONFIN DE LA SIERRA DE GATA”, impresu en Cáciris, en u anu de 1993, cun referencia a us noblis que viviran en Valverdi, dici D. Florentino, na página 21 “Además del ya citado don Juan Cid de Orta, del que sabemos tan poco,…”

Uma vez que D. Florentino encendi a mecha, u mei interés é seguil aportandu aceite a candela pa mantel a luz que ilumini a us que queiran profundizal; en esti casu, en relación cun us noblis que alguma vez residiran aquí.

De entre elis, temus a uma familia que perteneceu a u linaji Cid.

Us hermanus García Carraffa en u tomu vinticuatru de u sei “DICCIONARIO HERÁLDICO Y GENEALÓGICO DE APELLIDOS ESPAÑOLES Y AMERICANOS”, impresu en Madrid en u anu de 1926, comentan que había varias ramas cun u apelliu CID aunque nun tinhan relación de parentescu entre elas. Alguns miembrus de as lineas que moraban en dois concellus du partiu de Orense probaran a sua fidalguía duranti us siglus XVI, XVII y XVIII en a Real Audiencia y Chancillería de Valladolid. Duas líneas galegas se foran a vivil a primeira a Orense y a segunda a Portugal.

A finais du siglu XV, uma familia Cid, que tal vez descendera de a casa galega, ya vivía en Zamora.

A esta familia de Zamora perteneceu Hernán González Cid que casó cun Joana da Silva; que pur u que he podiu sabel, da documentación consultá na Real Audiencia y Chancillería de Valladolid; viviran na ciai de Lisboa. Foran padris de Joao González Cid que se uníu en matrimoniu cun Lionor Dias y tuveran un fillu chamau Antonio Dias Cid que cun María de Horta, sua esposa, procrearan a Miguel, a Juan, a Josefa María y a Jorge Cid de Horta.

É posibli que Joao y Lionor se vinheran a vivil a Valverdi en compañía de u sei fillu Antonio, a sua nora y netus, a finais du siglu XVI y que en esti lugal ostentaran certa notoriedai ya que a mayoría das zagalas nacías a finais de esti siglu y a primeirus du siguienti, que se bautizaran en a Igresia Parroquial, levaban pur nomi “Leonor”.

U netu Miguel, figura comu padrinhu de bautizus en Valverdi a primeirus du siglu XVII y Jorge, foi vicinhu de Valverdi que ganhó u día 7 de Diciembri de 1625 uma ejecutoria de nobleza en a Real Audiencia y Chancillería de Valladolid.

Entre us fundamentus que se alegan na ejecutoria de nobleza, se dicía que se distinguían en u reinu de Portugal de us plebeyus en as ropas - vistían toa clasi de génerus de sedas - nun pagaban impuestus, comu tamén se sabía que nun pagaban en Valverdi, ni en Zamora; dondi había siu admitiu en u gremiu de us fillusdalgus de sangri, realizandu oficius públicus honrosus de esti estau y gremiu. Ademais, us testigus lisboetas acreditaran que u sei bisabuelu Hernán González foi caballeiru du “Habito de nosso Señor Jesus Cristo”.

U Habito de nosso Señor Jesus Cristo foi creau en Portugal pur u rey D. Denis, cun u fin de preserval u patrimoniu y u espíritu da malográ Orden de us Templarius, sendu confirmá esta nova Orden por a bula du Papa Juan XXII en 14 de marzu du anu 1319.

Jorge foi padri de Juan Cid de Horta, u nobli que menta D. Florentino en u sei libru. Esti D. Juan Cid de Horta, tal vez se volvera a Zamora duranti certu tempu, dondi ejercería en calidai de Regidol de dita ciai. Se sabi tamén que levantó uma companhía de Cabalus Corazas, habendu empenhau toa a sua hacienda en esta empresa, cun a que sirviu comu Capitán duranti seti anus a u reinu, hasta que foi feriu y morreu das secuelas das lesions, dejandu a sua mullel viuda cun cincu fillus.

Ésta era Dª. Mariana de Ledesma, en nomi da cual un de us cincu fillus, que se chamaba D. Juan Cid y Ledesma; solicitó carta requisitoria de fidalguía alegandu que en u anu de 1642 entraran us portuguesis en Valverdi, saquearan a casa de us seis padris, les robaran, levándusi to u que en ela tinhan: mueblis, ropa branca, joyas de prata y de oiru, trigu, tapicerías y papeis, especialmenti a carta de fidalguía; ademais de verterlis u vinhu y u aceiti y dejandu toa a casa arrasá igual que as du restu de u lugal. Esta incursión, foi uma de tantas que a u largu de a raya se ficeran cun motivu de a Guerra de Secesión portuguesa, que tuvu iniciu en u anu de 1640. Comu consecuencia de éstas, a viuda quedó en indigencia, contandu comu medius de sustentu umas fincas cerca da fronteira, que nun explotaban pur meu a que volveran a entral us portuguesis ficendu de as suas.

Aquel fillu de D. Juan Cid de Horta, chamau D. Juan Cid de Ledesma se casó cun María Carrasco, cun a que tuvu a D. Juan Cid y Carrasco, a u que, de u sei matrimoniu cun Dª. Petronila Valdenebro; le naceu D. Juan Cid Valdenebro. Soy de a oponión que a casa que apareci en u Catastru du Marqués de Ensenada a nomi de D. Juan Cid de Horta, debería figural a nomi de u sei netu D. Juan Cid Valdenebro, ya que D. Juan Cid de Horta viviu na primeria mitai du siglu XVII y u Catastru é de mediaus du siglu XVIII.

U netu de D. Juan Cid de Horta, se uniu en matrimoniu cun Dª. María Vera y Macacho. Ésta pertenecía a familia de us Macacho residentis en Valverdi, de entre us que apareci en u Catastru de Ensenada D. Blas Silverio Macacho, en u apartau de “Notarios Apóstólicos”; cun a profesión de Procurador y Abogado. Otru Macacho, que se chamó D. Cristobal José Posadas Macacho apareci comu Alcaldi y Castellanu du Castelu y fortaleza de a Villa de Curiel y Regidol de a Casa du Excelentísimu Sr. Duqui de Bejar, en u anu de 1735.

Du matrimoniu de Juan Cid Valdenebro y Dª. María Vera y Macacho naceran us hermanus Blas y Juan Cid y Vera.

Blas Cid y Vera, graduau pur a universidai de Salamanca, siguiu us pasus de us seis antecesoris, comu así se acredita en uma petición de examen de Abogau, que elevó en u anu de 1785 ante u Real Consellu de Castilla.

Estis dois hermanus valverdeirus Blas y Juan, presentaran en un pleitu de fidalguía, en u anu de 1788 en a Real Audiencia y Chancillería de Valladolid, a ejecutoria ganhá pur u sei cuartu abuelu Jorge Cid de Horta, en u anu de 1625.

US NOMIS DAS CALLIS EN VALVERDEIRU.

2009-11-18T23:26:00.004+01:00

Si non recordu mal, a primeira calli que u ayuntamentu le asignó u nomi en valverdeiru é unma que está detrás da praza du Santu Cristu y perpendiculal a Avenida del Espiritu Santo.
U primel nomi que se do a aquela calli foi u de Dª. Pilar Montero Fandiño, pero agora esta calli se chama CALLE US MUNHUS.
Depois, nu anu 2004, u plenu du ayuntamentu en sesión de 21 de Diciembri acordó dal u nomi de CALLE U EMIGRANTI a que hasta entoncis era cunhocía comu Travesía de la Cañada.
A primeirus de esti anu, mais concretamenti u día 20 de Eneiru u ayuntamentu en plenu, acordó denonimal en "A FALA" seis vías públicas, aproveitandu que, pur entoncis se desarrollaba un Tallel de Empleu Plurirregional, que comu "Sierra de Gata II" y na especialidai de alfarería fician entre otras coisas placas de cerámica cun us nomis das callis.
A u mei parecel, consideiru que esti últimu acordu ha siu u mais completu, non pur u númeru de callis as que aproveitandu a confección das placas en cerámica se les do u novu nomi en Fala o en unma das suas variantis, u nosu valverdeiru; sino porque tamén se acordó cun u nomi, cambial a u valverdeiru a denominación da categoría da vía pública.
Me explicu, nus acordus anterioris solu se pusu en valverdeiru u nomi, pero a CALLE se sigui chamandu CALLE, cuandu u mais acertau hubera siu, cambial tamén CALLE pur CALLI.
En esti últimu acordu digu que se cambió tamén u tipu da vía pública a u valverdeiru, é dicel: CALLI, PRAZA...
Veamus cualis son:
PRAZA DA CONSTITUCIÓN.
PRAZA DU SANTU CRISTU
CALLI 1º DE MAIO.
CALLI SALVALEÓN.
CALLI SAN PEDRU D´ALCÁNTARA.
RINCÓN DU FORNU.
Agora habrá opinons pa tos us gustus, alguén pensará que sería millol que se escribiran tamen en castellanu, oitrus que ¿por qué non se cambian as denominacions de toas as callis na Fala?, oitras dirán que vaya manía de andal sempris cambiandu u que ficeran us de antis. A mí personalmenti, me gustaría que se puseran as cerámicas y en relación cun us nomis sería interesanti rescatal nomis de callis cun muta solera nu lugal, das que si preguntamus as persoas mais veteranas du lugal, inda é muy posibli que recordin cualis eran, comu: Calli Larga, Calli As Parras, Calli da Iglesia, Calli de Arriba ó Calli Porta de Arriba ó Porta de Arriba, Calli Larga de Arriba, Calli du Barrosu, Calli du Pósitu, Calli Aduana, Calli da Cárcil, Calli da Devesa, Calli da Fonti, Calli da Praza, Calli du Castelu, Calli Nova, Calli San Sebastián.
Nota.- A fotu que ilustra esti traballu é propiedai de Luis Bellancu y representa unma vista da Calli Larga.

VALVERDI. ¿Pur qué a chamamus Valverdi du Fresnu?

2009-07-07T19:50:00.008+02:00

¿De ondi ven u nomi du nosu lugal?

Hay varias opinions, mais comu hasta agora nun tenhu cunhocimentu de que se haya publicau ninhunma que se basi en documentus totalmenti certeirus sobri u “nomi” y sobri u “apelliu” de Valverdi, voy ei tamén, en razón a u que conhozu; a lanzal a minha hipótesis.

U día 10 de juniu de 1992, na sección Tribuna du diariu HOY aparecía, baju u títulu: "Sobre los orígenes de Valverde del Fresno", firmau por David Piñero que, entre otras coisas, dicía:

"Gracias a los trabajos de investigación de Enríque Burguet Fuentes, que durante largos años ha visitado bibliotecas y archivos, buscando en estanterías y viejos armarios, podemos saber hoy de dónde le viene el nombre a nuestro querido pueblo.

.../...

Vaya en este escrito nuestro agradecimiento a Enríque Burguet Fuentes, por su preocupación en la ardua labor de indagar en el túnel del tiempo, sacando a la luz mucho de la oscuridad que envuelve nuestro pasado".

Nu artículu se dicía que u nomi de Valverdi le vinha de un fresnu que había nu mediu da praza, según figuraba nas "Relaciones Topográficas de los Pueblos de España"; obra que pudi estudial fai poicu, gracias a desinteresada colaboración que me ofreceu Enríque Burguet con quen me sintu en deuda.

Nú prólogu du libru: “Relaciones Topográficas de los Pueblos de España. Lo más interesante de ellos”, escritu pur D. JUAN ORTEGA RUBIO, Catedráticu de Historia de Espanha na Universidai Central, editau nu anu de 1918; manifesta que as Relacions se ficeran en razón a distintas órdinis du Rey Felipe II, en us anus de 1574 a 1578. Us originais de estas Relacions se conservan na Real Biblioteca de San Lorenzo del Escorial.

Nu foliu 19 du tomu VII dici: “Descripción de la villa de Valverde por el rector Velasco.»

U rectol Velascu comenza dicendu:

“Valverde.

En la sierra de Gata, provincia de Extremadura, hay una villa de 600 vecinos, que es de la Orden de Alcántara y del partido de Gata, fundada no hace 200 años y poblada por los vecinos de otra villa que se despobló y cuyo nombre era Lalnaleón, a la cual el autor del Pontifical llama equivocadamente Monleón, distante de la primera 3 leguas, también de los restos de otro pueblo que se despobló del mismo modo y distante una legua de Valverde que se decía Torre de la Mata. Tomó el nombre de Valverde por el sitio en que se halla fundada, siendo de notar que en medio de la plaza hay rica y abundante fuente de agua, la cual está al pie de un fresno muy grande, cuyo tronco tiene 42 pies de a diez puntos de gordo, y dentro de dicho tronco, que está hueco, pueden caber 5 o 6 personas.

…/…”

U autol du Pontifical, y u rectol Velasco se equivocaran na lectura das respostas de Valverdi, ya que ni se trataba de Lalnaleón, ni de Monleón, comu suponhu que vus habréis dau conta. Era Salvaleón.

Según estas respostas que se deran as cédulas requisitorias du Rey Felipe II, vemus que Valverdi se chama asina pur u sitiu ondi se encontra enclavau.

Tamen pensaríamus, que u apelliu Fresnu le ven pur u árbul que se encontraba nu mediu da praza, que era bastanti singular pur a sua envergadura; sinembargu, na relación solu se nombra a u lugal pur u nomi. Nu restu du textu que fala du lugal, en ninhun párrafu apareci Valverde del Fresno; solu dí que está en a Serra de Gata, provincia de Extremadura.

¿Cómu aparecía u nosu lugal nus documentus oficiais?

Dejandu aparti as grafías mais u menus acertás de Balverde, Valberde, Valverde; en un documentu poi aparecel escritu de varias formas distintas.

Veamus:

Archivo General de Indias. Sección Contratación 5219, N.1.R.3.

Esti documentu trata de un expedienti de información y licencia de pasajeiru as Indias. U pasajeiru era u nosu paisanu Pedro López. Está fechau nu anu de 1557. Era un criau de Antonio Rosales. Contadol de Guatemala.

U foliu primeiru comenza: “En la villa de Balverde que es de la orden y partido de Alcántara…” Si siguimus leendu u documentu volvi a aparecel solu Valverde y volvi a dicel igual que en un foliu primeriu que é da “Orden y partido de Alcántara”.

Fala solu de Valverde, igual que en as Relacions de Felipe II, escritas vinti y tantus anus depois.

Na Real Chancillería de Valladolid, na sección de Hijosdalgo, encontramus unma carta requisitoria de Hidalgía, de 1671, de D. Juan Cid de Orta, pur habela quemau u Rebeldi Portugés. Nesti documentu encontramus “Balberde, Villa de Balberde, Villa de Valberde de Alcántara, Villa de Balberde de Alcántara tierra de Sierra de Gata”.

En 1726, un vecinho vendi a otru un asentu de munhu de pan muel, cun u sei terrenu a u sitiu chamau “Los Montejos”. Escritura que fai u escribanu du ayuntamentu D. Silvestre Carrasco. A escritura comenza: “En la Villa de Valverde, a treinta y uno del mes de…”

En 1735, dois vecinhos que foran Alcaldis nu anu anteriol, otorgan podel pa sel representaus na Real Chancillería de Valladolid. U documentu empeza: “En la Villa de Valverde, a dos días del mes de…”

Na Real Chancillería de Valladolid, encontramus un extensu pleitu entre dois cunhaus nu que apareci Valverdi asina:

“…/…

A los señores Alcaldes Ordinarios, o sus Lugar Tenientes de la Villa de Valverde del partido de la ciudad de Coria...

…y tierras en la Villa de Valverde

…Zenso de Valverde

…Apoderado y vecino de Valverde Franciso Sevillano.

…y vecinos de Valberde en la Sierra de Gatta.

…sobre los propios y rentas de la Villa de Valverde de la Sierra

…con facultad real contra la Villa de Valverde de la Sierra de Gata”.

Veamus de novu.

Nu númeru 68 da revista Alcántara Enero-Junio 2008, apareci u artículu: “Orígenes históricos y pervivencia de “A Fala”” de D. Domingo Domené Sánchez.

Dici D. Domingo Domené que nu siglu XII duranti a repoblación de estas terras se puseran de acordu u obispu da Ciai (Ciudad Rodrigo) cun u de Coria y cun a Ordin du Hospital; marcandu us límitis de ca unma das diócesis, aceptandu a diocésis de Coria que as iglesias de Trevellu y Fresnu (Fraxinete), pasaran a diócesis da Ciai. Dicía que Fraxinete estaba a u suroesti das Ellas y que en fecha descunhocía dejó de sel da Ordin du Hospital pa sel de realengo y cuandu as Ellas dejó de sel de Coria pa agregarsi a encomenda de Salvaleón a que pertenecía (Valverde de la Sierra); as duas “El Fresno” y “Valverde de la Sierra” se uniran pa formal u que hoixi se cunhoci comu Valverde del Fresno.

Apunta u señol Domené que U Fresnu se debería de encontral na zona cunhocía comu A Cañá.

Tumba antropomorfa na zona da Cañá.

Creu que cuandu se apunta que u nosu Valverdi, algunma ve se chamó “Valverde de la Sierra”, debi de entendersi comu unma maneira resumía de dicel “Valverde de la Sierra de Gata”. Nun debemus dal mutu créditu u nomi Valverde de la Sierra sin mais pa u nosu lugal, ya que Valverde de la Sierra existía, pero nun pertenecía a entoncis provincia de Extremadura. Valverde de la Sierra era y é actualmenti un lugal da provincia de León.

E mais lógicu pensal que se le chamaba y se solía escribil comu Valverde y que pa diferencialu de otrus Valverdis se anhadían us complementus “de la Orden de Alcántara, tierra de la Sierra de Gata”, tamén “de la Sierra” cuandu ya se había identificau a u lugal en otra parti du documentu.

U que está claru é que nu siglu XVI, que tinhamus un fresnu hermosu na praza, as referencias a Valverdi, que abundan nus documentus civís, destacan pur a ausencia du Fresnu nu nomi.

Pur u tantu siguindu a pista du señol Domené, é muy probabli que us primeirus documentus que falin de Valverde del Fresno se encontrin nus archivus eclesiásticus y que estén ficendu referencia a Valverdi a partil du momentu en que se despobla U Fresnu y us seis moradoris se venin pa u nosu lugal; mentras que nus documentus civís hasta avanzau u siglu XVIII nun fora tan común identificalu de esta guisa, comu hemus vistu. Nomi que pudu dil trascendendu desde a Iglesia hasta us vicinhus y finalmenti a us estamentus civís debiu seguramenti a influencia positiva que poicu a poicu fora ejercendu a coincidencia du árbol da praza, según diba ficéndusi mais singular, pur a sua longevidai y a envergadura que cun us anus diba collendu.

Comu hay muta posibilidai de que a famosa fonti que se nombra nas “Relaciones topográficas de los pueblos de España”, siga nu subsuelu da praza, u que procura a humedai suficienti pa que un fresnu se dé con muta facilidai; nun estaría de mais volver a rehabilital un fresnu nu mediu da praza. Idea que tamén se apuntaba nu artículu du diariu HOY, de fecha 10 de juniu de 1992. Nas inmediacions du fresnu podría instalarsi un atril informativu nu que aparecera u comenzu da descripción de Valverdi según aparecía nas “Relaciones Topográficas de los pueblos de España”.

Esti fresnu podría engalanarsi tamén nas festas navidenhas y sempris sería milhol que cortal un abetu ca fin de anu.

AS PÉLUMIS.

2009-03-05T21:39:00.017+01:00

Fai cerca de cuatru anus Enrique Burguet Fuentes me dó duas fotografías de unma pedra que le había chamau mutu a atención postu que estaba labrá artificialmenti desde tempus ancestrais.
Acompañaba as fotus cun un pequenu traballu, en dois folius, a unma sola cara; nu que describía a pedra, aportandu a sua hipótesis sobri a posibli utilidai que le deran us antiguos.
Moviu pur as suas pesquisas y en razón a que él ya nun se acordaba ondi había feitu as fotus, me pusi a caminhar pur a zona ondi pensaba que pudía estal ubicá; tomandu únicamenti comu referencia un pequenu trozu da serra que aparecía nu fondu de unma das fotus.
Estuvi varias minhás merodeandu sin chegal a dal cun u que buscaba, pero ca pasu que daba me acercaba mais a ela, moviu pur unma forza extranha, que me levaba hasta a sua posición.
Finalmenti pa minha sorpresa, guiau pur unma certa intuición, me subí encima de uns barrocus, y a vista se foi, comu si supera de sempris que alí se encontraba; a fijarsi sin duda ninhuma sobre aquela enigmática pedra que estaba esperándomi na finca du arroyu Castañu, nu términu das Ellas, sabi Dios cuántus centus de anus.
Na mais toparmi cun ela, algu despertó nu mei interiol un afán desmesurau pur dal cun a utilidai pa que foi feita. Estuvi mutu tempu dandu voltas u tema; diva y volvía a dil u sitiu, pero sempris u regresal de alí me quedaba umna certa inquietud nas minhas entranhas.
Ficía fotografías das inmediacions. Estuvi cun us amus da finca, que me deran toas as facilidais pa entral y ficel de ela cuantas fotus quisera.
Mutas vecis estuvi tentau de falal da pedra tomandu comu própias as referencias de Enrique. Otras me frenaba sintindu un gran empuji que me levaba a leel y sabel sobri us primeirus pobladoris de estis lugaris y a suas costumbris. Esa misma forza me levaba unma y otra vez a visital y escudrinhal pur us alrededoris.

Encontrí tumbas antropomórfas que me falaban dus visigodos, tamén ví sobri u terrenu unma bandeja feita en granitu, a ras du solu, que pur aquí alguns me dicin que se chama "lagareta", otrus simplementi "pila".

Inda nun me daba pur contentu cuandu nas últimas vecis que andaba escudrinhandu, me dí conta que fora da finca y lindandu cun a pared Norti da misma, se encontraba un solu de granitu cun duas incisions perfectamenti feitas, y paralelas entre elas. Ambas tinhan a misma forma y tamanhu y me daban a sensación de que a sua utilidai podría habel siu pa introducil algún tipu de posti que se levantara verticalmenti sendu de cada umna de estas incisions.
Na parti Sur du solu encontrí un canal. Cuandu estaba ensimismau dandu voltas a esti novu hallazgu, ví que na pared que lindaba cun u solu había umna pedra formandu parti da pared que estaba labrá y pur a forma pudría tratarsi de algún tipu de contrapesu.Tos estis hallazgus me levaban hacía un mismu caminhu que me alejaba ca vez mais du que inicialmenti había moviu u mey interés. Pur istu me pusi en contactu cun Enrique y le mandí fotus dus meis hallazgus pur si él tinha a oportunidai de entrevistarsi cun persoas entendías en temas arqueológicus u etnográficus que mus alumbraran sobre to istu.

Sentía gran desazón pur u tema y falandu cun Luis Miguel, Técnicu da Mancomunidai de municipius da Serra de Gata, ésti do parti das minhas preocupacions a us Técnicus du Area de Rehabilitación Integrada, que enseguía contactaran cunmigu y vinheran a visital u terrenu.
Isabel falaba cun u sei companheru u Aparejadol; e intercambiaban as suas opinions técnicas de to u que diban vendu, mentras ficían as fotus pa insertal nu informi, que me dijeran que enviarían a Sección de Patrimonio da Junta de Extremadura.
Dentru da finca ondi mora a famosa pedra que me moveu a to istu, mentras ei falaba con Jesús u fillu du amu, que mus había abertu as portas y, depois de oivil alguns dus comentarius dus Técnicus, y uniu a toas as minhas anterioris pesquisas; as pezas du "rompecabezas" se foran juntandu de forma creu que certeira.
A pedra, definitivamenti dejó de rondal na minha cabeza comu objetu mágicu, pur u que me decía Isabel y se foi transformandu en utensilu agrícola, de esta maneira:
Primeiru José, funcionariu du ayuntamentu das Ellas, cuandu le preguntí estis tempus atrás pur u nomi cun u que se cunhoci u terrenu ondi se encontran toas estas pezas das que venhu falandu; me diju que se cunhoci comu PÉLUMES o PELUMES. Y asina pudi efectivamenti comprobal que apareci nu catastru.
U sustantivu latinu pa denominal unma prensa de lagal, era PRAELUM PRAELUMI, tamén PRELUM PRELUMI, levandu a maior forza da pronunciación na primeira sílaba; e dicel PRElum PRElumi; pur u tantu u lugal ondi se encontraban as prensas suponho que se diría PRÉLUMI y partindu de istu a sua evolución etimológica pudo derival en PÉLUMIS - PÉLUMES.
Segundu, a pila a ras du solu, que alguns me dijeran que se conhoci comu "lagareta" y otrus comu "pila", ben pudu tratarsi de unma prensa olearia rudeimentaria romana, que cun u tempu tamén pudu tel usu comu lagar pa pisal a uva.
Terceiru, u solu de granitu cun u canal, cun as duas incisions, y a pedra labrá a modu de contrapesu; mus leva tamén a otra forma mais traballá de prensa de aceituna de época tardorromana o visigoda; de maneira que us cortis paralelus, ben definius y profundus sobri u solu levantarían dois pedestais, de madeira, que sustentarían a palanca y está terminaría cun u contrapesu.

Cuartu, a pedra objetu dus meis desvelus, que se encontra dentru da finca, sería probablimenti otru clasi de prensa romana. Ésta ten duas plataformas o bandejas; unma encima da otra, y cada unma cun un canal pa seida du líquidu.
En a plataforma de arriba se prensaba a aceituna y u zumu descendía hasta a segunda plataforma, ondi irían quedandu us restus dus pipus y us posus; pasandu ya depurau a través du canal de esta segunda plataforma a us recipientis.
Na parti superior traseira de esta pila, se encontran us cortis sobri us que se montarían us ejis que accionarían a palanca pa prensal a aceituna.
Finalizandu us fundamentus das minhas opinions, digu que a producción de aceituna y aceiti en tos us nosus lugaris da Serra de Gata, ha siu y é abundanti y provén de us tempus mais remotus.
U mei deseu primoridial que me moveu, desde que Enrique me envió as fotografías hasta finalizal esti traballu que agora estais leendu foi u de promovel u interés y a defensa de estas reliquias y que tos, tantu us vicinhus destis lugaris comu as nosas autoridais, sepamus valoral y conserval esti patrimonio y evital nu posibli que sea esquilmau pur desaprensivus y descastaus, sin escrúpulus.

Asesinatu du Cura Párrocu.

2009-01-23T17:04:00.007+01:00

En Valverdi existía umha costumbri, que ei viví de pequenu, y que tinha u sei iniciu comu consecuencia du asesinatu de un cura párrocu du lugal.
Se trataba de tiral umha pedra nu sitiu ondi us malloris dicían que umha partía de ladrons habían raptau o matau a un cura du lugal. Esti sitiu se encontraba nu caminhu de Valverdi a ermita du Espíritu Santu y, comu a costumbri era de gran arraigu populal, a pila de pedras amontoná era considerabli.
Agora, que nun existi ni a costumbri ni a pila de pedras nu caminhu; he tiu a boa sorti de encontral referencias de bo créditu sobri u asesinatu y a sorti que correran algúns dus asesinus, entri us que figuraban us tristementi cunhucius comu “los Montejo”; de us que supi gracias a D. Florentino Parra Iglesias, cronista da nosa villa, que mus fala de elis nu sei libru “EN EL CONFÍN DE LA SIERRA DE GATA”, impresu en Cáciris, nu anu 1993.
D. Florentino Parra, nu capítulu “EL TRÍSTEMENTE CELEBRE MONTEJO” de ditu libru, depois de transcribil un parti publicau nu boletín oficial da provincia de 5 de septiembri du 1839, relativu a morti de 16 membrus da gavilla du Monteju; escribi: “A raiz de esta última derrota, tanto el Montejo, como su sobrino Narciso Flores, se esfuman sin que se vuelva a saber de ellos”. Y sigui mais adientri: “Creemos que él nunca se rindió, a pesar de ser vencido, y que posiblemente se exilió en Francia en unión de otros leales de don Carlos”.
Us Montejus nun se exilaran a Francia, pur u menus u sobrinhu Narciso Flores, du que volvemus a sabel treci anus depois.
Pudía sel u 12 de Maio du anu 1852; D. Pedro Benito Picado cura párrocu de Valverdi du Fresnu se encontraba cazandu, probablementi na zona ondi a costumbri populal foi levantandu a pila de pedras a modu de tristi recordu du que en aquel fatídicu día y lugal aconteceu y tamén pur u mutu apreciu que us vicinhus de entoncis le profesaban.
D. Pedro foi sorprendiu y maniatau pur umha partía que capitaneaban us Monteju, us cuais tamén habían dau morti en otras ocasions a dois notablis hermanus de Valverdi, apellidaus Quiroga y a D. Pedro Mateos, entri otrus.
A partil de aquel momentu, cunhocendu us lugarenhus a maneira de obral de aquelis vándalus; comenzaran a temel pur a sorti du sei cura párrocu. U únicu que superan foi que a mesma tardi da sua desventura, escribiu umha carta a sua familia pidindu, de rescati pur a sua vida; doscentas onzas. Seti días depois, inda nun se sabía du sei paradeiru pur u que us mais cercanus au cura, a sua familia y amigus; se encontraban apesadumbraus pensandu que prontu podrían tel nuticias de un novu crimen y que esti podría vil de Portugal, ondi se sabía que us Monteju tinhan a sua residencia y protección.
Dois mesis depois, habendu recibiu us raptoris u importi exigiu, asesinan au cura sin piedai, nu reinu de Portugal, ondi u habían levau.
Tras arduas tareas de búsqueda tantu pur parti das autoridais nosas comu das portuguesas, son capturaus us criminais nu entoncis concellu de Moncorbo, da provincia de Tras-os-Montes. Us periódicus que informan da nuticia, non dudan de que as autoridais portuguesas pondrán a us asesinus muy prontu nas mans dus delegaus españois en razón de un conveniu internacional firmau nu 8 de marzu de 1823, que en aquelis anus siguía vigenti.
Umha vez entregaus us criminais, se forma juiciu sumariu milital contra elis y casi dois anus depois se pronuncia sentencia pur u tribunal milital contra Narciso Flores (a) Montejo y contra Santiago Ramiro (a) Cervato. Son declaraus culpablis de aprehension, roibu y asesinatu verificaus na pesoa du cura párrocu de Valverdi du Fresnu, D. Pedro Benito Picado nu anu de 1851. Según apareci nu periódicu de entoncis: “LA ESPERANZA. Periódico Monárquico. Número: 2828. Lunes 9 de Enero de 1854”.

La ilustración pertenece al proyecto LIFE, no permite su uso comercial.

A sentencia foi de pena de morti en garroti vil, sentencia que recibiran con resignación na capilla da Iglesia u día 27 de Diciembri de 1854, dois días antis da ejecución que se levó a cabu publicamenti nu lugal. Espectáculu que quedaría pa sempris grabau nas pesoas que u viran, pur a crudeza y posibli sufrimentu dus ejecutaus.
Foi tamén sorprendenti pa us que estuveran au lau dus reus en aquelis dois últimus días da sua vida, de qué maneira tan devota se prepararan, confesaran y asistiran a us actus religiosus previus a ejecución, aquelas duas pesoas tan apegás au crimen.
Us vicinhus presentis se digustaran bastanti mentras se ejecutaba a sentencia ya que u pau du garroti vil era demasiau gordu; istu fizu a ejecución mais larga y dolorosa tantu pa Narcisu comu pa Santiagu; tendu que dil us vicinhus du lugal a buscal umha azulea pa degastal u pau; situación que us dois reus superan sufril cun bo espíritu.
Pareci sel que esta ejecución sirviu pa acercal mais as poblacions rayanas baju u acordu recíprocu, - ya que a situación fronteriza daba lugal, cun frecuencia a albergal criminais de un lau y de otru; - de que ninhumha de elas consentiría nu sei términu ninhún tipu de criminais.
Esti relatu se basa nus feitus que aparecin reflejaus nus periódicus de aquelis anus, que citu a continuación:

“Edición de Madrid - EL CLAMOR – Diario de Administración, Comercio, Industria, Ciencias, Literatura, Artes, Noticias Oficiales y Anuncios”. Número: 2413. Miércoles 2 de Junio de 1852.

“Edición de Madrid – EL CLAMOR POPULAR – Periódico del Partido Liberal”.Número: 2447. Martes 15 de Julio de 1852.

“EL ÁNCORA. Diario Religioso-Social, Económico-Administrativo, Literario, Mercantil, de Noticias y Avisos”. Número: 974. Martes 31 de Agosto de 1852.

“LA ESPERANZA. Periódico Monárquico”. Número: 2828. Lunes 9 de Enero de 1854.

ESCUDU NA CASA DUS FRADE.

2008-09-30T21:50:00.004+02:00

Esta fotu a tomí da fachá da casa que está na calli Ramón y Cajal du nosu lugal fai agora mais u menus un anu, cuandu me propusi comenzal a buscal información sobre a procedencia du blasón y u linaji a u que pertenecin as suas armas.

A casa perteneci na actualidai a familia Frade Claros a cual agradezcu a sua desinteresá colaboración.

Us hermanus Frade Claros dejaran nas minhas mans escrituras públicas y privás da sua propiedai que he podiu estudial duranti mediu anu y das que he sacau pistas certeiras que me levaran hasta u linaji dus ENRIQUEZ DE CASTILLA.

De esta casa y du sei blasón se ha falau muy poicu hasta agora pur u que dentru de poicu tempu daré a cunhocel us resultaus das minhas investigacions nas que vus falaré du blasón da fotu y vus contaré u procesu que me levó hasta u linaji dus ENRÍQUEZ DE CASTILLA. Apelliu que levaran casi toa a Grandeza de España ademais de Reyis, Infantis y Príncipis.

Si alguén cunhoci de algún traballu publicau que fali de esta casa u du sei blasón, me gustaría que dejara un comentariu dandu referencias de comu se poi accedel a cualquera publicación que pudera existil; de esta maneira non us silenciaría pur descunhocimentu y podrían ajudarmi na tarea que me proponhu.

Tamen u Ministeriu de Cultura disponhía de traballus feitus nus anus 70. Estis se ficeran antis da promulgación da nova Ley de Patrimoniu estatal y da transferencia de competencias a Comunidai Autónoma. Estis traballus se consultaban a través dus PIC (Puntos de Información Patrimonial). Pareci sel que esis archivus ya nun existin y us PIC se han disoltu.

Pur estis motivus nun podu contal cun a información que se daba da casa dus Frade y du blasón a través de ditus PIC. Si alguén ten copia da dita información le quedaría muy agradeciu si me dera a posibilidai de consultala.

MONEDA ROMANA.

2008-09-19T21:01:00.006+02:00

Enrique Burguet Fuentes e un jovin con raicis valverdeiras que mostra gran pasión pur toas aquelas coisas que teñan que vel cun Valverdi y u sei entornu.
Busca, estudia y recopila información, ademais de ficel traballus comu u que agora voy a darbus a cuñocel relativu a uma moneda romana que encontró un paisanu nosu nesti términu.
A mi, sinceramenti, m´ hubera gustau subil a fotu da moneda juntu cun a impronta feita pur Enrique, peru nun he pudiu conseguil du propietariu da moneda que m´a prestara pa ficel as fotus d´ela. Pur isu, solamenti vus subu a imagen da impronta.
Voy a respetal u traballu d´ Enrique Burguet y u transcribu en castellanu, tal y comu él u fizu; fundamentalmenti pa que poda servil de proveitu tamén a toas aquelas persoas amigas y estudiosas da numismática de lengua castellana en general.
Dici Enrique na introdución du sei traballu qu´u interés principal qu´u moveu a ficel esta clasificación da moneda era pa que sirvira a datación arqueológica dus restus constructivus ondi se encontró.
Ei, pur nun contal cun u permisu du propietariu y nu ánimu de preserval u lugal de visitas sin escrúpulus voy a omitil tantu u nomi du poseedol da moneda comu du lugal ondi se encontró.

Adriano. (117-138 d. C.)
(Publius Aelius Hadrianus).
Última emisión de 134 -138 d. C.

VALOR: Sestercio. (AE).
ANVERSO: HADRIANUS-AVG.COS III.P. (P). Busto laureado a derecha. (Gráfila).
REVERSO: (SALUS-AVG.) S. (C). Salud en pie a derecha con pátera en su mano izquierda, frente a un altar en el que se enrosca una serpiente que come de su mano derecha. (Gráfila).
CECA: Roma.
MÓDULO: 27, 95-30 mm.
PESO: 18,420 gr.
POSICIÓN DE CUÑOS: A las 12 horas. Normal, sin giro.
BIBLIOGRAFÍA: Juan R. Cayón. “Los Sestercios del Imperio Romano”. Volumen II. Madrid, 1984. Tipo 723, páginas 217 (foto), y 218.
OBSERVACIONES: Debido al excesivo desgaste que presenta la pieza, nos atendremos con las
oportunas reservas a la clasificación apuntada.
PROCEDENCIA: Término de Valverde del Fresno. (Cáceres). Hallazgo casual en superficie.
PROPIEDAD: De su descubridor…
NOTA: Queremos expresar nuestra más sincera gratitud a su poseedor, por las facilidades prestadas al prestar temporalmente la pieza y facilitar con ello en gran medida, la misión de hacer improntas, así como el estudio y la clasificación formal.
ESTUDIO Y CLASIFICACIÓN: D. Enrique Burguet Fuentes.
IMPRONTA:

César.

2008-02-24T12:44:00.006+01:00

César é un nomi de varón que na miña familia u temus pur partía dobli.
U primer César é mei hermanu. Ya de zagal mostró gran afición a fotografía y as suas primeiras perras de traballu foran pa comprarsi un cursu y material de laboratoriu pa revelalas en blancu y negru.
Agora con as posibilidais que mus brinda a red, ha subiu a "flirk" algumas instantáneas pa compartilas con nos.
Ficei clic nu enlaci que vus deju debaju desti textu y podréis disfrutal de fotus feitas tantu nu sei lugal de residencia comu duranti as festas du lugal, du pasau verán 2007.
http://www.flickr.com/photos/23396739@N05/

U segundu César é u nomi du primeiru dus meis fillus.
Comu sei tiu, desde ben mozu ha sentiu u afán de plasmar instantis y dalus a cuñocel.
E por isu, que na misma comunidai da red ten uma selección de fotus pa compartil con vos.
Nesti casu a dirección é a que vus anotu agora:
http://www.flickr.com/photos/ojosdeserpiente/
Felicitu us dois César da familia por u ben que plasman esis fugacis momentus que pasan por as nosas vidas, con duas ópticas distintas, desde dois ángulus diferentis y desde distintus tempus, y us exhortu pa que mus sigan dandu a posibilidai de compartil con elis esis momentus.

A vos, visitantis desti pequenu rincón vus deseu un feliz día.

SEMANA SANTA 2007.

2007-03-14T22:18:00.000+01:00

José Berrío y José Suárez, socius da Cofradía de la Vera Cruz, me entregaran u programa de Semana Santa desti anu 2007.

Na portá apareci "U amarrau" destacandu sobri un fondu brancu.

En primel lugal a Cofradía comenza agradecendu a colaboración a tos us veciñus y a tos aquelis que venin a pasal cun us seis familiaris y amigus a nosa Semana Santa u lugal.

Depois sigui u escritu afirmandu que "cun a vosa presencia y participación, conseguiremus qu´as nosas costumbris y tradicions permanezcan vivas".

U programa d´actus e comu sigui:

JOVIS 15 DE MARZU.- As oitu da tardi trasladu de "Jesús Nazarenu" a Igresia. A continuación tendrá lugal a Novena.

VERNIS 23 DE MARZU.- As oitu da tardi celebración da Eucaristía y depois a procesión du "Santu Vía Crucis", cun u recorriu de costumbri.

JOVIS 29 DE MARZU.- As oitu da tardi Confesión comunitaria, na Igresia Parroquial.

VERNIS 30 DE MARZU.- As oitu da tardi celebración da Eucaristía y a continuación "Procesión da Virgen dus Doloris". U final da procesión u Grupu Coral Valverdeiru despedirá a Virgen cun a plegaria "Sálvami".

DOMINGU 1 D´ABRIL (Domingu de Ramus).- As 11 da miñan se procederá a bendición dus "Ramus" na Ermita du Santu Cristu y procesión hacia a Parroquia pa celebral a Eucaristía. As cuatru y media da tardi rezu du Santu Rosariu y subasta dus pasus das imáginis, na Ermita.

2, 3 y 4 D´ABRIL.- De 11 da miñan a 2 du mediu día y de 5 a 7 da tardi; se repartirán as "Bicas de No Señol", na cochera d´Angelines, que se encontra na Avenía de don Santus Robledu.

JOVIS SANTU 5 D´ABRIL.- "Procesión dus Pasus" desdi u Santu Cristu a Igresia a partil das cuatru y media da tardi. As 7 da tardi celebración da "Cea du Señol". As 10 da noiti "Procesión dus Encontrus", depois a "Hora Santa" frenti u Monumentu.

VERNIS SANTU 6 D´ABRIL.- As 10 de miñan, trasladu das Imaginis u Santu Cristu. Pur a tardi a isu das 6, celebración da "Pasión y morti du Señol" y as 10 da noiti "Procesión du Santu Enterru".

SABADU SANTU 7 D´ABRIL.- As 10 da noiti celebración d´"A Luz, U Bautismu y a Eucaristía" na Igresia Parroquial. As 11 da noiti "Procesión du encontru con Jesús Resucitau", terminandu na Ermita du Santu Cristu.

Ei personalmenti vus animu tantu us creyentis, comu us curiosus y a tos aquelis que s´encontrin pur esas fechas nu nosu lugal, que nun dejin d´asistil y participal nas procesions cun recollimentu y respetu, pa podel recibil a forza, u encantu y a belleza que transmitin tantu as imáginis, comu as lucis y as estampas de algumas callis, sin olvidal u sentimentu que ponin us barrenecus y a seriedai y armonía dus que siguindu a tradicion as vivin tos us anus con piedai.

Felicis Festas de Semana Santa.

ESPACIUS PA CREACIÓN JOVEN EN VEGAVIANA.

2006-12-03T00:22:00.000+01:00

Na página web na que se fala dus Espacius pa creación joven, y a que podéis accedel ficendu clic sobri u enlaci que vus incluyu a continuación: http://www.espaciosparalacreacionjoven.net/, dí qu´estis espacius son sitius d´encontru ondi us jóvinis podin dal a cuñocel as suas facetas artísticas y creativas, usandu us medius que estis espacius dejan a sua disposición y que son de difícil accesu a mayoría dus jóvinis.

Esti fin de semana un equipu móvil desti proyectu ha feitu pará en a localidai de Vegaviana, a escasus kilómetrus de Moraleja dandu a oportunidai us jóvinis da zona a participal en as distintas actividais que abarca comu artis musicais, plásticas, escénicas, etc...

Pur u tantu ha posibilitau us novus artístas dus nosus lugaris darsi a cuñocel na plaza du Ayuntamentu de Vegaviana. Han postu mutu empeñu e ilusión aunque había escasa presencia de públicu y ficía un friu que "pelaba us hosus".

Us nosus paisanus actuaran u Sábadu día 2 de Diciembri. Comenzó a joven de 15 anus de Valverdi Trinidad Rivas, a isu das seti da tardi cantandu versions de composicions de música ligera española y alguma canción propia que ten u sei meritu na a sua edai. A continuación, actuó u grupu de rock valverdeiru, de recienti creación, denominau "In Trámiti", destacandu as suas versions en valverdeiru de composicions rockeiras españolas y uma canción propia, tamen en valverdeiru, que deran a cuñocel pur primeira vez nun mediu de comunicación pública, nu programa da televisión extremeña, "Bravo por Extremadura", u día 18 de Octubri pasau. Hay que dicel que debi sel u primel grupu de música que canta na nosa fala. Terminaran u pasu pur esti Espaciu pa creación joven us componentis du grupu das Ellas, denominau "T4", que tocaran uma docena de cancions propias con suma maestría, sobri to u gitarra solista Sevito.

Sería bo, dau u interés pur a música que vemus nus jóvinis destis tres lugaris qu´as institucions públicas da zona promoveran escuelas de música o facilitaran espacius públicus ondi us zagais puderan ensallal, ocupandu u sei tempu de ociu desta forma.

TERCEIRA EDICIÓN DE PREMIUS "ANDARES".

2006-12-02T00:19:00.000+01:00

Nu municipiu de Montehermoso existi uma asociación pa conservación da naturaleza y a cultura tradicionais que se denomina "ANDARES".
Esta entidai fomenta a conservación da naturaleza y revaloriza as culturas tradicionais y as costumbris popularis cun u fin de preservalas pas generacións futuras.
Esti anu, na terceira edición de premius que organiza esta asociación y duranti u transcursu desta mesma tardi du primeiru día de Diciembri se ha feitu homenaji a cultura tradicional, otorgandu un galardón a cada un dus ayuntamentus dus tres lugaris: As Ellas, San Martín de Trevellu y Valverdi du Fresnu pur u mantenimentu y a conservación du nosu dialectu.
Us actus se desarrollaran na Casa de Cultura de Montehermoso y deran comenzu as oitu da tardi. Depois da inauguración se impartiu uma charla sobri u folclori y a historia da indumentaria tradicional de Montehermoso y a sua semenjanza con as tradicions iberoamericanas. Se proyectó un audiovisual sobre "Los Negritos" de Montehermoso y otras tradicions parecias en Hispanoamérica, África e Inglaterra. A continuación actuaran "Los Negritos de San Blas" de Monthermoso y por últimu se entregaran us galardons tantu us nosus ayuntamentus, comu a otras persoas y entidais comu reconocimentu a difusion y conservación du patrimonio cultural, y pur a conservación du mediu ambienti; según reza nu programa.

FESTAS DE NO SEÑORA DA ASUNCIÓN.

2006-08-04T19:24:00.000+02:00

Esti e u cartel das Festas de No Señora (Siñora) da Asunción du presenti anu 2006.

A continuación adaptu a u valverdeiru u programa qu´ha publicau u ayuntamentu de Valverdi du Fresnu nun libru que comenza cun us saludas du señol Alcaldi y da señora Tenienti d´Alcaldi.

ACTIVIDAIS DIPURTIVAS Y CULTURAIS.

TORNEU DE VERAN DE FÚTBOL-SALA.
Du 31 de Juliu u 5 d´Agostu nu polideportivu municipal D. Cándido Pérez Vega, a partil das vinti horas. Us premius serán: 1º 200 € mais un trofeu. 2º. 100 € mais un trofeu.

CAMPEONATU DE TUTI, MUS Y ZÁPITI.
Du 7 u 12 d´Agostu, dambus inclusivi, nu Hogar de mayoris qu´está na calli Levadiña. Us premius cunsistin nun trofeu pu 1º y otru trofeu pu 2º clasificaus. Colabora a Asociación "A Ilusión da tercera edai de Valverdi du Fresnu. Pa mais información dirigirsi u Hogar de Mayoris.

EXPOSICIÓN DE FOTUS ANTIGUAS DE VALVERDI DU FRESNU.
Cun fotus cedías pur viciñus da localidai.
Comenza u día 9 y está aberta hast´u día 12 d´Agostu, na Biblioteca municipal cun entrá pur a calli San Pedru d´Alcántara y nu horariu de 10 a 13 horas y de 16 a 20 horas.

EXPOSICIÓN D´ARTESANÍA.
A cargu d´artesanus locais y aficionaus de manualidais.
Du 9 a u 12 d´Agostu nu horariu de 10 a 13 y de 16 a 20 horas, nu antiguo Bar dus Jubilaus que está na calli U Meiu.

EXPOSICIÓN DE PINTURA DE JAVIER FIGUEREDO. Artista da localidai.
Du 9 u 12 d´Agostu nu local municipal du ayuntamentu, na Plaza da Constitución, 11. De 10 a 13 y de 16 a 20 horas.
Enlacis que falan de Javier Figueredo:
http://http://www.google.es/search?sourceid=navclient&hl=es&ie=UTF-8&rls=GGLJ,GGLJ:2006-27,GGLJ:es&q=Javier+Figueredo

http://http://www.elperiodicoextremadura.com/noticias/noticia.asp?pkid=220462

http://http://www.ayto-caceres.es/tablon/IMJ/ACTA_Jovenes_Creadores.pdf

DIA 9 D´AGOSTU. Mérculis.
As onci da noiti pregón das festas na Plaza de Constitución a cargu de D. Domingo Frades Caspar.
Enlacis que falan de D. Domingo Frades:
http://http://www.google.es/search?sourceid=navclient&hl=es&ie=UTF-8&rls=GGLJ,GGLJ:2006-27,GGLJ:es&q=Domingo+Frades

http://http://www.culturagalega.org/resultados_busca.php?Corpo=domingo+frades

http://http://www.aplexextremadura.com/

Mentras dura u pregón, se repartirán, cun a ajuda das asociacions de viciñus, emigrantis y amas de casa; pañizuelus das festas y ponchi pa tos us presentis.

Na continuación de pregón DISCO MOVIL SHOW na mesma Plaza.

DÍA 10 D´AGOSTU. Jovis.
De mediudía hast´as duas y depois das 4 da tardi hast´as 8 da tardi, na zona da cruz dus queidus; PARQUI INFANTIL GRATUITU pa tos us zagais y zagalas que podrán disfrutal cun:
- Tren chu-chu.
- Motus - cars.
- Castelus hinchablis.
- Festa da espuma.

Pur a noiti a partil das onci, nu pabellón polideportivu municipal, D. Cándido Pérez; TEATRU/COMEDIA P´ADULTUS cun a obra titulá "PARELLA ABERTA" de Dario Fo y Franca Rame, que será representá pur u grupu SURIPANTA TEATRU.
Web du grupu de teatru: http://http://www.suripantateatro.com/home.htm

DÍA 11 D´AGOSTU. Vernis.
De 10 da miñan a 1 du meiudía XOGUS TRADICIONAIS, INFANTIS, na Cru dus queidus. A inscripción se fairá meia hora antis de cada proba.
XOGUS:
- Carreira de sacus.
- Xogu da silla.
- Soga-tira.
- Carreira da patata.
Colaboran as asociacions de viciñus, emigrantis, y u grupu de monitoris d´ociu y tempu libri da localidai.

As 6 da tardi CAPEA U ESTILU TRADICIONAL con solta de vaquillas y 1 nuvillu, pur as callis de localidai, ameniza cun uma charanga.
VALROCK FESTIVAL 06. Segunda edición. Na plaza de toirus. Apertura de portas as 8 y meia. Organiza Bar Pepe y colabora u ayuntamentu.
Página oficial desti eventu: http://valrock.iespana.es/

As 12 menus cuartu cun a colaboración de asociación A REVOLEIRA. Ruta nocturna a cabalu.

DIA 12 D´AGOSTU. Sábadu.
As onci da miñan, nas plazas du Fiscal D. Jesús Vicente Chamorro y da Constitución, GIM-CANA INFANTIL. A inscripción meia hora antis das probas na plaza da Constitución.

As 7 da tardi GRAN ESPECTÁCULU ECUESTRI A CARGU DE RANCHO SARAY, na plaza de toirus. U organiza Ernestu y Juan Traballus agrícolas.

As 7 y meia da tardi, nu campu de futbol da Divisiña FUTBOL "VALVERDI CONTRA VISITANTIS".

As doci da noiti, Gran Verbena popular, na plaza da Constitución, cun a orquesta "MUSICAL SUEÑOS".

DÍA 13 D´AGOSTU. Dumingu.
As 6 da tardi CAPEA U ESTILU TRADICIONAL, cun solta de vaquillas y 1 nuvillu pur as callis de custumbri, amenizá cun uma charanga.

As onci da noiti, na plaza du Fiscal D. Jesús Vicente Chamorro ACTUACIONS dus grupus de rock da localidai.

DÍA 14 D´AGOSTU. Lunis.
As novi da miñan RUTA DE SENDERISMU: "Camiñu da Devesa - Ruta da Agua". Cun seida desdi a plaza du Santu Cristu. Duración ida y volta umas 3 horas. A chegá se ofrecerá un refrigeriu us participantis.

As 7 da tardi, na plaza da Constitución, subía a CUCAÑA. U premiu UN JAMÓN.

As 12 da noiti GRAN VERBENA POPULAR, na plaza da Constitución, amenizá pur a orquesta TROTAMUNDOS.

DÍA 15 D´AGOSTU. Martis.
As 12 du meiu día MISA Y PROCESIÓN EN HONOR DE NO SEÑORA DA ASUNCIÓN. Depois y duranti to u día, recorriu pur as callis da charanga "EL BOMBAZO".

As 12 de noiti GRAN VERBENA POPULAR na plaza da Constitución, amenizá pur a orquesta FANTASÍA SHOW.

DÍA 16 D´AGOSTU. Mérculis.
As 10 da noiti EXHIBICIÓN DE SEVILLANAS, RUMBA Y BATUKA na pista polideportiva da Divisiña.

As 12 da noiti fin de festa cun FOGUS ARTIFICIAIS nu campu de futbol.

DÍA 20 D´AGOSTU. Dumingu.
As novi da noiti, na avenía de Portugal, juntu a Casa de Cultura, cumía popular da vaquilla.

CONCERTU EN "A ESTRELA".

2006-07-28T17:42:00.000+02:00

Amiñán, día 29 de Juliu du 2006, a partir da media noiti, y na Discoteca "A Estrela", du nosu lugal, tendrá lugal un concertu, en directu, ondi se darán a cuñocel dois grupus de zagais du lugal.

U primel grupu qu´apareci nu cartel se chama "IN TRÁMITI" y está formau pur Juanjo, Chuchi, Maikel, César y Álvaro.

U segundu grupu e "SOL NAVAJERO" y u componin: Miguel, Luis, Manuel y Álvaro.

Vus enviu desd´esti rincón valverdeiru us meis milloris deseus.

A Piscina du Pretil y u merendeiru de Julian.

2006-07-08T09:21:00.000+02:00

Tos us anus, cuandu chega u verán, somus mutus y mutas valverdeirus y valverdeiras que mus acordamus da piscina du pretil.

Se trata d´uma piscina natural que se fizu nu cauci da riveira de Sabugal, fai mais de trenta anus, sendu Alcaldi du lugal don Vicente Muriel.

Se chega pur a antigua carreteira de Navasfrías, partindu da Avenida de Salamanca o desd´a calli As Cortis, por citar algumas das vías máis utilizas pa accedel a ela y dista du centru du lugal no mais de setecentus metrus.

U anu pasau non pudemus disfrutal dus chapuzons y dus refrescus das suas aguas, debiu a sequía, peru esti anu, de momentu, se encontra chea y rebosanti comu nus milloris verans.

E uma riqueza que temus en Valverdi da que, comu valverdeiru, me sintu orgullosu, peru sería bo que as institucions se implicaran un poicu pa restaurala y adecental to u entornu, nun estaría de mais tampocu que se ficera un paseu iluminau ya que son mutus us zagais y zagalas y veciñus en general que pasean pur as noitis pur a antigua carreteira de Navasfrías, buscandu a frescura da riveira y se transita tamén cun ciclomotoris, motocicletas y toa clasi de vehículus motorizaus, habendu escasa iluminación pur as noitis cun u peligru que representa, sobri to pus peatons, sendu ademais estreita a carreteira nesi tramu.

Tamén se podría instalal algum cartel nas inmediacions da piscina ondi se ficera un avisu a canalla y a tos us usuarius en general, nu sentiu fundamentalmenti de que respetin u entornu y procurin mantel limpa a piscina y us seis alredeoris.

Asina procurariamus alargal a vida desti refrescanti paraji pa que podan disfrutalu tamen tos aquelis que veñan detrás de nos.

E d´agradecel qu´a familia de Julian "u molineiru" y de Petra, a sua viua, tos us anus mus abran u merendeiru nu que antis era u muñu pa que mus refresquemus tamén pur dentru.

S´eitan en falta as ensalás que preparaba a tía Petra cuandu vivía Julian, aunque alabu u tesón desta mullel qu´a sus noventa y tantus anus feitus inda se movi pur u merendeiru recollendu cualqueira coisa pa ajudal us seis netus.

Aquelis y aquelas que gustin d´aguas chocas, se asteñan de metersi nesta piscina, purque as aguas da riveira de Sabugal están feitas pa emocións fortis.

Curiosu mapa.

2006-05-11T22:28:00.000+02:00

A finais du pasau mes d ´Abril m´ enviaran d´un Colegiu da nosa provincia, dois ficheirus en formatu "jpg", nus que se representa un curiosu mapa de títulu "Territorios de Lingua Galega", nu que na parti izquerda figura uma reseña u nosu rincón baju a denominación de "Val do río Ellas".
Seguí us pasus pa enterarmi de dondi proviña esti mapa y resulta ser qu´uns paisanus nosus de vacacions pur Galicia se toparan cun él de ventas en librerías.
He podiu velu tamen na realidai, e dicel, en formatu papel, tal y comu se vendi nas librerías galegas.
U autol du mapa se chama Ramón Pais Pazos.
Vus mostru na fotu un detalli du referiu mapa, ondi podemus aprecial claramenti u nosu valli tal y comu u ve y u nombra u autol du mesmu.
Tamén pudeis vel u mapa u completu si ficéis "clic" sobri u enlaci que tindis baju a fotu.
Y s´algún curiosiu desea telu, creu que ficendu "clic" nu segundu enlaci baju a fotu, ten a posibilidai de compralu.
Us galegus, y sobre tó u señol José Enrique Costas están ficendu (fendu) mutu pur dal a cuñocel a nosa fala, que podría chamarsi u Xalimegu pur falarsi nu Val de Xálima y tel raicis galaciu portuguesas, peru creu que se confundin aquelis que dicin que falamus galegu. U galegu e uma coisa y u que nos falamus, aunque mus alegremus d´entendermus cun elis, falandu comu falamus e oitra coisa distinta aunque u padri u a madri da nosa fala falaran nu sei día u mesmu cus padris du galegu actual.

http://andelvirtual.com/tev/album/mapa_territ.jpg

http://www.andelvirtual.com/tev/catalogo/ver.php?pid=7407

Polémica Fala.

2006-04-26T22:58:00.000+02:00

U pasau 21 desti mes, u Bloqui Nacionalista Galegu pidiu a Xunta de Galicia que defendera u galegu que se fala nu Val de Xalima, igual qu´u que se fala en Asturias, León y Zamora. Estas manifestacions du BNG han levantau uma polémica cun a Junta de Extremadura que recorda que nesta zona nun falamus galegu, sino un dialectu derivau du troncu común du galaicu portugués cun adherencias asturleonesas, dicendu tamén qu´a nosa fala goza de boa soidi. Ademais u governu extremeñu ha ditu que ten a confianza de qu´ a Xunta de Galicia no fairá casu dus torpis cantus de sirena dus aprendicis de bruxos cun us que l´ha tocau governar nesa terra hermana, lamentándosi que perda u tempu con esas fantochás. A conta destas manisfestacions entra na polémica a Xunta de Galicia qu´a través da sua vicepresidencia pidi a Ibarra que se disculpi dientri dus galegus y du propiu governu galegu, postu que s´ha faltau gravementi u respetu du Governu galegu y u sei presidenti. Na edición desta mesma miñán du periodicu Extremadura da a entendel qu´a polémica ha remitiu, postu qu vicepresidenti da Xunta de Galicia, Anxo Quintana, do adiel pur zanjau u conflictu institucional que s´había abertu cun as manifestacions du BNG. Tamén aparecin nesta mesma edición umas manifestacions de varius viciñus declarandu que aquí nun falamus galegu si ben temus palabras parecías. Na otra página se publica uma entrevista feita u señol D. Antonio Viudas Camarasa, Filólogu y Académicu Extremeñu que di que na polémica sobri a fala nadie ten razón. P´u señol Viudas Camarasa a coisa nun está tan clara, dí que faltan documentus, faltan estudius, nun hay testimonius escritus. Y nun admiti que sea sólu galegu u que nos falamus. Hoixi y cun motivu de toas estas polémicas han visitau as Ellas, San Martín de Trevellu y Valverdi du Fresnu reporteirus du períodicu ABC qu´han entrevistau a pesoas dus tres lugaris en relación con to esti rifirafi. Pareci sel que saldrá publicau u traballu nu dominical de ditu periodicu du próximu día 30.

Semana Santa, 2006.

2006-03-27T21:28:00.000+02:00

He tomau de referencia u programa d´actus da Cofradía da Vera Cruz, u he traduciu du castellanu u valverdeiru.
Antis de dal a cuñocel u programa, a Cofradía fai esti saluda:
Un anu mais, a Cofradía da Vera Cruz saluda us viciñus y da a benvinda us visitantis y a tos us que pur estas fechas regresáis u lugal cun a ilusión de participal da nosa Semana Santa.
Agradecemus a vosa presencia y a vosa colaboración.
Que Cristu Resucitau vus conceda soidi y muta felicidai.
Aleluya.
Siguindu ditu programa da Cofradía da Vera Cruz, us actus pa esti anu son:
XOVIS, 23 DE MARZU.
20,00 h. Trasladu du Nazarenu a Iglesia, depois trendrá lugal uma novena.
VERNIS, 31 DE MARZU.
21,00 h. Procesión, Santu Vía Crucis.
XOVIS, 6 D´ABRIL.
19,00 h. Confesión comunitaria.
VERNIS, 7 D´ABRIL.
20,30 h. Procesión da Virgen dus Doloris. Na terminación da procesión, u grupu coral valverdeiru despedirá a Virgen cun a plegaria "Sálvami".
DOMINGU, 9 D´ABRIL. (Domingu de Ramus).
11,00 h. Bendición dus ramus na Ermita du Santu Cristu y procesión a Parroquia pa celebral a Eucaristía.
16,30 h. Rezu du Santu Rosariu y subasta dus pasus das Imáginis, na Ermita du Santu Cristu.
10, 11 y 12 D´ABRIL.
De 11,00 a 14,00 horas y de 16,00 a 19,00 horas se repartirán as "Bicas de No Señol", nu sitiu de costumbri, cocheira d´Angelines, na Av. D. Santus Robledo.
XOVIS SANTU, 13 D´ABRIL.
16,00 h. Procesión dus Pasus, desdi u Santu Cristu hasta a Iglesia.
19,00 h. Celebración da "Cea du Señol".
22,00 h. Procesión dus "Encontrus", a continuación a "Hora Santa", anti u Monumentu sin límiti d´horariu.
VERNIS SANTU, 14 D´ABRIL.
10,00 h. Baixá das Imáginis u Santu Cristu.
18,00 h. Celebración da "Pasión y morti du Señol".
22,00 h. Procesión du "Santu Enterru".
SÁBADU SANTU, 15 D´ABRIL.
22,00 h. Celebración da "Luz, u Bautismu y a Eucaristía" na Iglesia.
23,00 h. Procesión du "Encontru cun Jesús Resucitau", terminandu na Ermita du Santu Cristu.

Voleibol.

2006-03-26T22:22:00.000+02:00

Hoixi, as doci y media du mediu día, nu pabellón polideportivu municipal, situ na zona da divisiña, do comenzu un torneu amistosu de voleibol femeninu.Según receba nu cartel anunciadol, había siu organizau pur u ayuntamentu du lugal cun a colaboración da Mancomunidai de municipius Serra de Gata y a Federación extremeña de voleibol.U partiu se disputó entr´u CLUB VOLEIBOL MEDINA CAURIA, de Coria y uma SELECCIÓN EXTREMEÑA.U altu nivel que exhibiran na cancha as xugadoras de cada un dus dois equipus, mus ficeran disfrutal a tos us que tuvimus a sorti de estal ali presentis, ya que pelearan y lutaran en toas as bolas dus cincu tempus du partiu.As componentis da Selección extremeña demostraran que eran as milloris da comunidai dandu uma exhibición du sei ben ficel, pero as corianas nun s´amedrentaran en niñun momentu y luciran as xugás d´un equipu ben engarzau subindu nu marcadol us milloris tantus du torneu.

As últimas aguas.

2006-03-25T13:03:00.000+01:00

Levamus uma temporá de mais d´un mes que chovi uma media de tres días a semana. Estas aguas tan ben queidas están procurandu qu´us ríus y arroyus valverdeirus mostrin us seis caudais comu feia tempu que nun viamus.

Adiel, 24 de marzu, fici estas instantáneas nu pretil y pur cima da piscina natural. Si u tempu mus sigui acompañandu desta folma, a primaveria lucirá a suas milloris galas nesti rincón y us amigus du pretil podremus gozal otru anu mais dus chapuzons y dus refrescantis bañus nas tardis du próximu estiu.

"GALEGO de Cáceres"

2006-03-18T12:45:00.000+01:00

Don Francisco Fernández Rei, Catedráticu de Filología Románica da Universidai de Santiagu de Compostela, nu Congresu sobri a Fala du Val de Xálima, que se celebró nus días 20 y 21 de Mayu du anu 1999 en San Martín de Trevellu; dicía que denominaba as falas desti vali comu "galego" de Cáceres" purque da abundanti bibliografía existenti pareci claru qu´estas falas, pertenecin sin duda niñuma u troncu galalicu-portugués. Dicía tamen que linguisticamenti tenin mutu mais que vel cun as falas galegas que cun u portugués estándar.
Nu anu 1991, nu programa da televisión galega "Sitio distinto" de Antón Reixa, se fizu un monográficu sobri as "falas raras", foi entoncis cuandu Don Francisco Fernández Rei, que estaba vendu u programa, coñoceu desta forma de falar nosa, y le chamó a atención ya que pensaba que falábamus portugués, según recordaba du que había liu (leiu) nu manual de Zamora Vicente. N´aquel programa faló u nosu paisanu Tomás Fernández Vázquez.
Habendu pasau un tempu da emisión d´aquel programa y cuandu ya nun s´acordaba d´aquela "fala rara" recibiu un traballu de D. José Enrique Gargallo que había siu expostu a primeirus du anu 92 nu "XX Romance Linguistics Seminar" que se celebró en Cambridge. Nu traballu, Gargallo falaba que as tres falas nosas "de hecho muy similares, descansan sustancialmente en una base constitutiva de tipo gallego-postugués (boas noitis; ceu; chegar; fieitu), lo cual parece explicarse por el origen de los primitivos repobladores de la zona (acaso en parte, también, de extracción astur-leonesa occidental)". Nu traballu de Gargallo se incluían redaccions feitas pur estudiantis dus tres pueblus (As Ellas, San Martín y Valverdi) que Don Francisco leeu us seis estudiantis que nun tuveran duda en localizalas nu territoriu "galego oriental, algún dixo que se cadra eran da área do galego de Asturias; pero a maioría sinalaron que debían ser das Portelas de Zamora".
Don Francisco contaba tamen nu Congresu sobri A Fala du Val de Xálima que pur aquelis días "en que eu realmente estaba a "descubrir", gracias a Gargallo, que existía o "galego" da Estremadura española" do uma conferencia en Vigo para falar du "Atlas Lingüístico Galego", na que comentó que cuandu se ficera uma nova redi de puntus d´un atlas lingüísticu galegu, tendría que reflejarsi "us tres lugaris". U organizadol da Conferencia, u escritol Méndez Ferrín, comentó que D. Jesús Vicente Chamorro, fiscal du Tribunal Supremu (ya falleciu), que era paisanu nosu, falaba comu nos en algumas ocasions en que había axistiu a algún actu en Galicia, disculpándusi pur nun sabel falal galegu, pero que pareci sel, según palabras de Méndez Ferrín "que os asistentes non tiñan problema para entender a fala "rara" dese valverdeiro".
Don Francisco continúa dicindu que mais adientri pidiu a D. Henrique Costas González que escribira un artículu para a revista "A Trabe de Ouro" cun u fin de "dar a coñocer desde Galicia a situación sociolingüística" da nosa zona. U artículu se publicó en setiembri de 1992, sendu, según D. Francisco; a primeira publicación en Galicia, y en galegu, sobri a procedencia y a vitalidai social du falal "esencialmente galego" dus tres lugaris. Dici tamén que a partil d´entoncis Costas se convirtiu nu incansabli "difusor e no princiapal investigador e coñecedor do "galego" do Val do Río Ellas ou valego".
U términu "valego" e preferiu pur Costas a otras denominacions da nosa fala.
A partil du descubrimentu desta zona pur us galegus, comenza uma fructifera variedai de publicacions, artículus y entrevistas nus medius de Galicia qu señol Don Francisco Fernández Rey relaciona exquisitamenti na sua conferencia nu Congresu sobri a Fala.
Continúa a sua conferencia expoñendu as distintas carácterísticas "das Falas de Xálima". Enumera y explica aquelis rasgus que son afins as falas galegas, sigui dandu a cuñucel us rasgus propius du castellanu, fai referencia tamén us trazus astur-leonesis, aquelis otrus característicus da nosa Fala; terminandu a sua magistral intervención dandu toas as referencias bibliográficas que apuntan a que u que nos falamus e un bocetu du galegu.
Si vus interesa cuñucel a conferencia y completal información, cun a abundanti bibliografía que sobri u tema relaciona nu final du sei traballu, u encontráis nesta dirección:
http://es.geocities.com/alendoval/CFernandez-Xalima.htm

"A fala extemeña se conserva pur un milagru filológicu".

2006-03-05T11:28:00.000+01:00

Na sección Regional da edición d´hoixi, día cincu de marzu du 2006; du diariu HOY, apareci publicá uma pequena entrevista a D. Antonio Viudas Camarasa, doctol en Filología Hispánica pur a universidai Complutensi y profesol titular desta materia na universidai d´Extremadura.

Según apareci nu diariu HOY, a entrevista se fai cun mutivu das charlas que vay a impartil amiñán nu salón d´actus da Caixa de Extremadura en Caciris y u martis nu hotel Husa-Zurbarán de Badajoz, sobri u tema das lenguas minoritarias en Extremadura.

Na entrevista, u diariu le fai preguntas sobri a Fala na que u doctol nun se decanta sobri a procedencia da nosa fala, apuntandu que hay varias versions, uns dicin que provén du galegu, otrus du asturianu y otrus du portugués. Tamén dici que n´actualidai falamus a fala umas cincu mil persoas. Supoñu que solu habrá tiu en conta us que vivimus nus tres lugaris duranti to u anu, ya que na diáspora podin sel 3.000 mais que tamén a falan.

Dí na entrevista tamén que a nosa Fala se conserva purque us falantis temus uma conciencia de falal uma coisa propia, añadindu que si se imparti na escuela omillol se poi destruil a Fala.

Esti e u enlaci que vus leva a entrevista:

www.hoy.es/pg060305/prensa/noticias/Regional/200603/05/HOY-REG-095.html

A Fala. Ben d´interés cultural.

2006-02-16T23:22:00.000+01:00

No Diario oficial d´Extremadura, nº.: 36 de 26 de Marzu de 2001, se publicó u Decretu 45/2001, de 20 de Marzu, pur u que se declaraba ben d´interés cultural a "A Fala".Solu ten un artículu nu que se estableci fundamentalmenti:
- Se declara Ben de Interés Cultural a "A Fala".
- Fala viva que e precisu promovel, cuñocendua tantu na vertienti histórica comu na actualidai.
- Fai falta seguil insistindu en vel de dondi ven, ficendu estudius parciais dus que agora en boa media carecemus.
- Nu planu históricu e fundamental ficel un estudio da toponimia menol.
- Se destaca a supervivencia de A Fala frenti as dificultais históricas y u sei afán de persistil cun a lingua común de tos us españois.
- E necesariu que as Institucions y Administracions Públicas coordinin as suas actividais pa garantizal a sua defensa y protección.
- As linguas non debin impuñelsi ni restringilsi nu sei usu desdi us poderis políticus o culturais.
- As Institucions debin tel a misión de velal pur u sei mayol cuñocimentu y pur facilital a sua libri difusión.
- A Fala mus perteneci us tres lugaris y debemus sel nos us que digamus comu deseamus praticala, en qué medía y cun qué limitacions.
- Finaliza u Decretu ficendu un recoñucimentu as Asociacions qu´han velau pur cunserval esti patrimoniu cultural.

Fala Fronteriza cun Portugal.

2006-02-15T23:23:00.000+01:00

Cumu previu a inclusión d´A Fala cumu ben d´interés cultural nu catálugu da Junta de Extremadura, u señol Doctor D. Antonio Viudas Camarasa da Real Academia d´Extremadura das Letras y das Artis, foi designau pa que emitira un dictamen a petición du entoncis Excmu. Sr. Consejeiru da Junta d´Extremadura sobri u dialectu y a sua inclusión comu ben de interés cultural.
Justifica a protección du nosu dialectu desd´u puntu de vista jurídicu, basandu a defensa tantu nu que di a Constitución comu nu que apareci nu Estatutu d´Autonomía de Extremadura. Nesti apartau declara qu´as variantis lagarteira, mañega y valverdeira; d´A Fala "presentan rasgus du galegu_purtugués, asturleonés, arcaismus lingüisticus medievais y certa castelanización".
Desd´u puntu de vista filológicu fai un rápidu recordatoriu dus estudius lingüisticus que s´han vindu fendu sobri A Fala matizandu que "nun existi unanimidai nus enfoquis da investigación científica, sobri to, pur a falta de documentus históricus y estudius globais sobri a fala".
Na conclusión du dictamen u señor Viudas Camarasa informó favorablimenti a declaración de ben de interés cultural pa "A Fala".
U dictamen cumpletu s´encontra nesta dirección:
"A fala, habla fronteriza con Portugal en la provincia de Cáceres", recomendu a sua lectura a tos us curiosus, amantis y estudiosus da nosa Fala.
Pa finalizal y comu ya he ditu notra ocasión u nosu dialectu debería denominarsi XALIMEGO.
Basu a miña proposta purque se fala nu Val de Xalima y pur a eminenti influencia galega.
U Xalimego ten tres fillus que son u lagarteiru, u mañegu y u valverdeiru.

Concertu de rock.

2006-02-13T00:06:00.000+01:00

U próximu día 18 de Febreiru se celebrará un concertu de rock y hip hop cun u motivu du primer Invernu Cultural da Serra de Gata. Será gratuitu y comenzará as 10 da noiti nus locais du Hotel "La Palmera". Pur u que apareci escritu nu periodicu,("Concierto de rock el día 18 en Valverde del Fresno") pareci sel que actuarán dois grupus de pur aquí cerca.

Festas de San Bras.

2006-02-12T23:44:00.001+01:00

Esti anu comenzaran as Festas de San Blas nu día 2, día das Candelas.
Us jinetis portaban antorchas mentras recorrían as callis du lugal a isu da queida da tardi.
Pur a noiti y na plaza terminaran u recorriu cun a cumía das migas fritas, café y aguardienti u estilu galegu.
U día tres se fizu a Misa au Santu y a procesión u estilu de sempris. Depois da misa y a procesión se repartiran perrunillas y aguardienti na plaza, amenizandu u acontecimentu uma charanga. Depois da cumía as mulleris vestías de picau y us jinetes animaran a festa comu tos us anus.
U Sábadu siguiu a festa comu sempris y pur a noiti hubu baili amenizau pur uma orquesta.
U Domingu pur a miñan montaran nus cabalus a us mais pequenus du lugal pa que non se perdan as boas costumbris. Pur a tardi siguiu u San Blas que coñocemus.
A festa terminó u Lunis, día 6 que comu antañu seiran us taberneirus.
Nestas festas colaboraran a asociación "A Revolera" y a de amas de casa "San Blas".

As nevis pur San Blas.

2006-02-12T23:11:00.000+01:00

Pur a miñán du domingu día 29 de Eneiru, tres días antis de San Blas, a serra apareceu vestía cun un mantu blancu. Cumu sempris que aconteci, somus mutus y mutas us valverdeirus y as valverdeiras que disfrutamus desta fugaz estampa y aproveitamus antis de que se disolva pa xugal cun ela.
Mutas familias subin pur a carreteira comarcal que leva a Navasfrías (Salamanca) y a altura da zona cuñucía comu "Us Llanus" disfrutan cun us fillus mais pequenus destis momentus. De esi día e a fotu que he subiu pa disfruti dus que non pudieran vivilu.

Valverde del Fresno.

2006-02-12T22:00:00.000+01:00

Valverde del Fresno.
E uma página que fici nu anu 99 dedicá u nosu lugal, un pequenu pueblu du norti da provincia de Cáciris que linda cun a provincia de Salamanca y cun a viciña nación de Portugal. Ademais de falal du lugal, da sua historia y das costumbris, teñu uma pequena exposición de algumas obras digitais que he feitu. Tamén tindis uma sección de fotus que as subi a redi mei amigu Luis Bellanco y un libru de visitas dondi podéis expresal con educación us vosus pareceris.